नाशिक (इंडिया दर्पण वृत्तसेवा) – घोड्यांच्या टापांचा आवाज… तलवारींचे ढालीवर पडणारे खणखणीत आवाज… लढाईचे चित्कार… तुतारीचे निनाद… छत्रपती संभाजी राजेंच्या भूमिकेतील कलाकार डॉ. अमोल कोल्हे यांचे संवाद… यामुळे लोकप्रियतेच्या उंचीवर गेलेला हा कार्यक्रम नाशिककरांनी कायमचा स्मरणात ठेवला. पहिल्याच दिवशी भरगच्च गर्दीने उच्चांक गाठला. थंडगार वार्‍याच्या झुळकीचा सामना करीत हजारो शिवप्रेमींनी साधुग्रामच्या मैदानावर प्रचंड गर्दी केली. खा. डॉ. अमोल कोल्हे यांच्या दर्जेदार अभिनयाला टाळ्या व शिट्ट्यांची दाद देत कार्यक्रमाने लोकप्रियतेचे टोक गाठले होते. नाशिकमध्ये झालेला आजपर्यंतचा हा सर्वोत्कृष्ट कार्यक्रम झाला असावा, अशी चर्चा प्रेक्षकांमध्ये सुरू होती
शिवपुत्र संभाजी महानाट्याची गेल्या काही दिवसांपासून नाशिकमध्ये डॉ. कोल्हे यांनी पूर्ण तयारी केली होती. लेखक आणि दिग्दर्शक महेंद्र महाडिक यांच्या या महानाट्यात शेकडो कलाकार सहभागी झाले. कार्यक्रमाच्या प्रवेशद्वारावरच जयप्रकाश जातेगावकर कार्यक्रमाला येणाऱ्या पाहुण्यांचे स्वागत करीत होते.
माजी उपमुख्यमंत्री छगन भुजबळ, माजी खासदार समीर भुजबळ, रविंद्र सपकाळ, अभिनेत्री सायली संजीव, शेफाली भुजबळ, कल्याणी सपकाळ, जयप्रकाश जातेगांवकर, नानाजी निकुंभ यांच्या हस्ते दीप प्रज्वलन करण्यात आले. ‘सपकाळ नॉलेज हब’चे प्रमुख रवींद्र सपकाळ यांच्या हस्ते शस्त्रपूजा करण्यात आली. जाणता राजा हा पहिला प्रयोग नाशिकमध्ये झाला होता. नंतर शिवाजी महाराजांच्या पूत्राचा पराक्रम पाहण्यासाठी नाशिककरांनी गर्दी केली आहे, असे मनोगत भुजबळ यांनी यावेळी व्यक्त केले. सुमारे तीन तास या महानाट्याने टाळ्या आणि शिट्यांनी दाद मिळविली. सर्वच कलाकारांनी जीव ओतून आपली कला सादर केली.
Nashik Shivputra Sambhaji Mahanatya Drama Started
