नाशिक (इंडिया दर्पण वृत्तसेवा) – शिवसेनेच्या उद्धव ठाकरे गटाचे नाशिक महानगर प्रमुख सुधाकर बडगुजर अडचणीत सापडले आहेत. बडगुजर यांच्यासह इतर दोघांना नाशिक जिल्हा आणि सत्र न्यायालयाने दीड वर्षे कारावासाची शिक्षा ठोठावली आहे. सरकारी कामात अडथळा आणल्याप्रकरणी बडगुजर आणि इतर दोघांवर खटला सुरू होता. त्याचा निकाल आज लागला. दरम्यान, बडगुजर यांना न्यायालयाने जामीन मंजूर केला आहे.
२०१४च्या लोकसभा निवडणुकीत बडगुजर आणि अन्य दोघांच्या वाहनात शस्त्र आढळून आले होते. त्यावेळी तत्कालीन सहाय्यक पोलीस आयुक्त आणि अंबड पोलीस ठाण्याचे तत्कालीन पोलीस निरीक्षक यांनी बडगुजर यांची विचारपूस केली. मात्र, त्यावेळी बडगुजर आणि अन्य दोघांनी हुज्जत घालत सरकारी कामात अडथळा आणला. याप्रकरणी अंबड पोलिस स्टेशनमध्ये गुन्हा दाखल करण्यात आला. याचा खटला नाशिक सत्र न्यायालयात सुरू होता. आणि आता न्यायालयाने बडगुजरसह अन्य दोघे दोषी आढळले आहेत. त्यामुळेच त्यांना कलम ३५३ प्रमाणे एक वर्षाची शिक्षा आणि प्रत्येकी पाच हजार रुपयांचा दंड, तसेच कलम ३७ आणि १३५ प्रमाणे सहा महिने कारावास आणि प्रत्येकी एक हजार रुपयांचा दंड ठोठावण्यात आला आहे. तशी माहिती सरकारी वकील रवींद्र निकम यांनी दिली आहे.
दरम्यान, ठाकरे गटाचे नेते दत्ता गायकवाड यांनी प्रतिक्रीया दिली आहे. ते म्हणाले की, घटना घडली त्या दिवशी सरकारी कामात अडथळा आणल्याचे एकूण तेरा गुन्हे दाखल झाले होते. या इतर गुन्ह्यातील सर्व दोषी निर्दोष सुटले. आणि बडगुजर व अन्य दोघांनाच शिक्षा झाली. या निर्णयाविरोधात आम्ही उच्च न्यायालयात अपील करणार आहोत.
Nashik Politics Sudhakar Leader Court Order
