नांदगाव (इंडिया दर्पण वृत्तसेवा) – येथील गिरणा नगर परिसरात पिकअप व मोटरसायकल यांच्यात समोरासमोर झालेल्या अपघातात एक जण ठार झाला. या भीषण अपघातात बाळू जाधव (४५) हे जागीच ठार झाले. धडक दिलेला पिकअप हा पलटी झाला. या अपघातात पिकअप चालकाला पोलिसांनी ताब्यात घेतले आहे. या घटनेचा पुढील तपास नांदगांव पोलिस करीत आहेत.
नाशकात दोन अट्टल चोर गजाआड; नऊ मोटारसायकली जप्त
दोन अट्टल चोरांना पोलिसांनी गजाआड करुन त्यांच्या ताब्यातून नऊ मोटारसायकली जप्त केल्या आहेत. अल्पवयीन साथीदारांच्या मदतीने ते चो-या करत होते. या चोरांना सीसीटिव्हीच्या आधारे ताब्यात घेण्यात आले. त्यांना अटक केल्यानंतर भद्रकाली,पंचवटी व सरकारवाडा पोलिस ठाणे हद्दीतील सहा गुन्हे उघडकीस आले आहे. ही कारवाई भद्रकाली पोलिसांच्या गुन्हे शोध पथकाने केली आहे.
दुर्गेश नानीकराम उबराणी (२५ रा.भन्साळी मळा, मखमलाबाद रोड) व अभिषेक अरूण वाघमारे (१९ रा.चुंचाळे शिवार, अंबड) अशी अटक केलेल्या संशयितांची नावे असून त्यांच्या दोन अल्पवयीन साथीदारांनाही पोलिसांनी ताब्यात घेतले आहे. भद्रकाली पोलिस ठाणे हद्दीतील मोटारसायकल चोरीचा शोध घेत असतांना पोलिसांच्या हाती परिसरातील सीसीटिव्ही फुटेज लागले. या फुटेजच्या पाहणीनंतर पथकाने कुंभारवाडा भागातील एका विधी संवर्धीत बालकास ताब्यात घेतले असता संशयितांचे बिंग फुटले. सदर मुलाच्या सांगण्यावरून पोलिसांनी सापळे लावून दोघा संशयितांसह एका अल्पवयीन मुलास ताब्यात घेतले असता त्यानी वेगवेगळय़ा भागातून अनेक दुचाकी चोरी केल्याचे समोर आले.
संशयितांच्या ताब्यातून नऊ मोटारसायकली जप्त करण्यात आल्या असून त्यातील सहा मोटारसायकली चोरीस गेल्याबाबत भद्रकाली,पंचवटी व सरकारवाडा पोलिस ठाण्यात गुन्हे दाखल आहेत. उर्वरीत तीन दुचाकीमालकांचा शोध घेतला जात आहे. ही कारवाई वरिष्ठ निरीक्षक गजेंद्र पाटील यांच्या मार्गदर्शनाखाली गुन्हे शोध पथकाचे सहाय्यक निरीक्षक किशोर खांडवी, हवालदार नरेंद्र जाधव, पोलिस नाईक सतिश साळुंखे, अविनाश जुंद्रे, संतोष खेताडे, शिपाई नितीन भामरे, नारायण गवळी, रमेश कोळी, संदिप शेळके, लक्ष्मण ठेपणे आदींच्या पथकाने केली.
