मालेगाव (इंडिया दर्पण वृत्तसेवा) – तालुक्यातील चंदनपुरी येथील सरपंचाने तहसील कार्यालयाकडे पत्र देऊन आमच्या ग्रामपंचायतीसह राज्यातील इतर ग्रामपंचायतींना देखील दोन उपसरपंच नियुक्त करावेत अशी मागणी केली आहे. या पत्रात राज्यात दोन उपमुख्यमंत्री मग आमच्या गावालाही दोन उपसरपंच देता येईल का? गावाचा विकास करण्यास अधिक मदत होईल असे नमूद केले आहे. यापूर्वी छत्रपती संभाजीनगरचे सरपंच राजीव सुदामराव साळुंके यांनी देखील अशीच मागणी थेट मुख्यमंत्र्यांकडे केली होती. पण, या मागणीचे पुढे काहीच झाले नाही.
चंदनपुरी हे गाव राज्यात खंडेरायाचे देवस्थान म्हणून प्रसिध्द आहे. खंडेरायाची दुसरी पत्नी बानाईचे हे गाव आहे. या गावचे सरपंच विनोद शेलार यांनी तहसील कार्यालयाकडे दिलेल्या पत्रात मार्गदर्शन मागवल्यानंतर या पत्राची चांगलीच चर्चा सोशल मीडियावर रंगली असून हे पत्र चांगलेच व्हायरल झाले आहे. चंदनपुरी गावची लोकसंख्या ही ६६२३ इतकी असून ग्रामपालिकेत ९ सदस्यांचे संख्याबळ असून २२ कर्मचारी या गावात कार्यरत आहेत. ग्रामपालिकेचे वार्षिक उत्पन्न ३५ लाखांच्या आसपास आहे. गावाचे भौगोलिक क्षेत्रफळ मोठे असल्याने गावाला दोन उपसरपंच मिळाल्यास गावाचा जास्तीचा विकास साधता येईल या गोष्टी या पत्रात नमुद केल्या आहे.
या गावचे सरपंच विनोद शेलार यांनी सांगितले की, राज्याला दोन उपमुख्यमंत्री तसेच राज्यातील सर्वच ग्रामपंचायतींना दोन उपसरपंच द्यावेत अशी मागणी मुख्यमंत्री यांच्याकडे सरपंच परिषदेच्या माध्यमातून आम्ही करणार आहोत. दरम्यान तहसीलदार नितीनकुमार देवरे यांनी ग्रामपंचायत अधिनियमाची तपासणी केली असून याबाबत दोन उपसरपंच नेमण्याबाबत कायद्यात कुठलीही तरतूद नसल्याचे सांगितले.
Nashik Malegaon Village Two Upsarpanch Selection Demand Chandanpuri Sarpanch CM Letter
