नाशिक (इंडिया दर्पण वृत्तसेवा) – नाशिक पदवीधर मतदारसंघ निवडणूकीच्या मतमोजणीस सुरवात झाली आहे. नाशिक पदवीधर मतदारसंघासाठी नाशिक विभागात ४९.३२ टक्के मतदान झाले असून याची मतमोजणी सय्यद पिंप्री येथील गोदामात २८ टेबलवर सुरू झाली आहे. यावेळी विभागीय आयुक्त राधाकृष्ण गमे, निवडणूक निरीक्षक डॉ. निपुण विनायक,नाशिक विभागातील पाचही जिल्ह्याचे जिल्हाधिकारी, सहायक निवडणूक निर्णय अधिकारी तथा उपायुक्त रमेश काळे उपस्थित होते.
या निवडणुकीत अपक्ष उमेदवार सत्यजित तांबे आणि महाविकास आघाडीच्या उमेदवार शुभांगी पाटील यांच्यात लढत होत आहे. दोन्ही उमेदवारांनी जोरदार प्रचार केला आहे. राज्यातील सर्वात कमी म्हणजे ४९ टक्के मतदान नाशिक विभागात झाले आहे. त्यामुळे हे अत्यल्प मतदान कुणाला फायद्याचे ठरणार, कुणाला तोट्याचे ठरणार यासह इतर राजकीय चर्चांनाही वेग आला आहे. पहिल्यापासूनच नाशिकची निवडणूक राज्यभरात गाजली आहे. काँग्रेसने उमेदवारी देऊनही विद्यमान आमदार डॉ. सुधीर तांबे यांनी अर्ज भरला नाही. त्याऐवजी त्यांचे चिरंजीव सत्यजित यांनी अपक्ष अर्ज सादर केला. शेवटच्या क्षणाला हा हायव्होल्टेज ड्रामा रंगला. तर, देशातील सर्वात मोठा पक्ष असे बिरुद मिरविणाऱ्या भाजपने मात्र या निवडणुकीत उमेदवारच दिला नाही. त्याचबरोबर अपक्ष उमेदवार शुभांगी पाटील यांना महाविकास आघाडीने पाठिंबा दिला. त्यामुळे ही निवडणूक अतिशय चुरशीची ठरली आहे.
Nashik Graduate Constituency Counting Started
