नाशिक (इंडिया दर्पण वृत्तसेवा) – द्वारका परिसरातील वडाळा नाका येथे एक घरात बॉम्ब असल्याची अफवा एका तरुणाने पसरवली. त्याची तातडीने दखल घेत नाशिक पोलिस, बॉम्बशोध पथक, अग्निशमन दल यांचे संयुक्त पथक तयार करण्यात आले. या पथकाने तातडीने द्वारका परिसराची तपासणी सुरू केली. मात्र, पथकाला बॉम्बसदृश कोणतीही वस्तू सापडली नाही. दरम्यान, पोलिसांनी गोकुळ कोंडीराम तुगार, (वय २०, रा. अहमदनगर) या तरुणाला ताब्यात घेतले आहे.
पोलिसांनी दिलेल्या माहितीनुसार, वडाळा नाका परिसरात बॉम्ब असल्याची अफवा एका तरुणाने पसरवली. त्यामुळे परिसरात एकच खळबळ माजली. त्याची दखल घेत बॉम्ब शोधक पथक, मुंबई नाका पोलीस, अग्निशमन दल, श्वान पथक यांना घटनास्थळी पाचारण करण्यात आले. त्यामुळे वडाळा नाका परिसरात भीतीचे वातावरण पसरले. नागरिकांनीही मोठी गर्दी केली. काही वेळ वाहतूक कोंडीही झाली. काही तासांनंतर स्पष्ट झाले की, बॉम्बची अफवा असल्याचे स्पष्ट झाले. मुंबई नाका पोलिसांनी गोकुळ कोंडीराम तुगार या व्यक्तीस ताब्यात घेतले. आरोपी व्यक्ती ही मानसिक संतुलन ठीक नसल्याचे दिसून येत असल्याचे मुंबई नाका पोलिसांनी म्हटले आहे. याप्रकरणी अद्याप गुन्हा दाखल झालेला नाही.
Nashik Dwarka area Bomb Rumer Youth Arrest
