नाशिक (इंडिया दर्पण वृत्तसेवा)- बदनामी करण्याची धमकी देवून औषध पुरवठा दाराकडे १५ लाखाची खंडणी मागितल्याचा प्रकार समोर आला आहे. टेंडरची माहिती मिळवित भामट्यांनी ५० हजाराची खंडणी उकळीत पुन्हा तगादा लावल्याने हा प्रकार पोलीसात पोहचला असून याप्रकरणी माहिती अधिकार कार्यकर्ते असलेल्या बापलेकाविरोधात मुंबईनाका पोलीस ठाण्यात गुन्हा दाखल करण्यात आला आहे.
पुखराज माणिकचंद जैन व निलराज पुखराज जैन अशी गुन्हा दाखल करण्यात आलेल्या संशयित खंडणीखोरांची नावे आहेत. याबाबत कपिल रमेश असोरा (रा.गणेशबाबानगर नाशिकपुणा रोड) यांनी फिर्याद दिली आहे. अरोरा यांचा शासकिय रूग्णालयांना औषध पुरवठा करण्याचा व्यवसाय आहे. जिल्हा शासकिय रूग्णालयातही ते औषध पुरवठा करीत असून गेल्या जानेवारी ते १२ जून दरम्यान संशयितांनी माहितीच्या अधिकारात जिल्हारूग्णालयाच्या टेंडर बाबत माहिती अधिकार कायद्यातंर्गत माहिती मिळवित अरोरा यांना ब्लॅकमेल केले.
जैन बापलेकाने बदनामी करण्याची धमकी देत ५० हजाराची खंडणी उकळली. त्यानंतरही १५ लाखाच्या खंडणीसाठी तगादा लावला. प्रसार माध्यमात खोट्या बातम्या प्रसारीत केल्याने अरोरा यांनी पोलीसात धाव घेतली असून अधिक तपास सहाय्यक निरीक्षक शिरसाठ करीत आहेत.
