नाशिक (इंडिया दर्पण वृत्तसेवा)- रेकॉर्डवरील दोघांसह अल्पवयीन मुलगा पोलीसांच्या जाळयात अडकला. शहर गुन्हे शाखेच्या युनिट दोन पथकाने घरफोडीत माहिर असलेल्या व स्कोडा कार मधून फिरणा-या या त्रिकुटाच्या मुसक्या आवळल्या असून, त्यांनी क्रांतीनगर येथे भरदिवसा घरफोडी केल्याची कबुली दिली आहे. संशयितांच्या ताब्यातील कार जप्त करण्यात आली असून या टोळक्यात ग्रामीण पोलीसांना गुंगारा देणा-या एका सराईताचा समावेश आहे.
सागर दत्तात्रेय गरड (३३ रा. सुखसागर पंचकृृष्ण लॉन्स कोणार्कनगर) व महेश सदाशिव मालखेडे (२१ रा. प्रोफेसर कॉलनी मोरेमळा पंचवटी) अशी अटक करण्यात आलेल्या संशयितांची नावे असून त्यांच्या अल्पवयीन साथीदारास पोलीसांनी ताब्यात घेतले आहे. युनिटचे हवालदार मनोहर शिंदे व अंमललदार महेश खांडबहाले यांना मिळालेल्या माहितीच्या आधारे ही कारवाई करण्यात आली. विल्होळी येथील डीमार्ट ते गौळाणे रोडवरून कारमधून फिरणा-या संशयितांनी मखमलाबादरोडवरील क्रांतीनगर भागात घरफोडी केली असल्याची माहिती पोलीसांना मिळाली होती. त्यानुसार पथकाने कचराडेपो भागात संशयित त्रिकुटाच्या मुसक्या आवळल्या असून त्यानी भरदिवसा केलेल्या घरफोडीची कबुली दिली आहे. संशयितांच्या ताब्यातून गुह्यात वापरलेली सुमारे अडिच लाख रूपये किमतीची कार जप्त करण्यात आली असून त्यांना मुद्देमालासह पंचवटी पोलीसांच्या स्वाधिन करण्यात आले आहे.
त्यातील महेश मालखेडे हा ग्रामिण पोलीसांच्या रेकॉर्डवरील गुन्हेगार असून तो निफाड,ओझर व सायखेडा पोलीस ठाण्यांमध्ये दाखल असलेल्या गुह्यात फरार आहे. ही कारवाई युनिटचे प्रभाही हेमंत तोडकर यांच्या मार्गदर्शनाखाली सहाय्यक निरीक्षक डॉ.समाधान हिरे,जमादार बाळू शेळके, शंकर काळे, गुलाब सोनार,विलास गांगुर्डे हवालदार संजय सानप, प्रकाश बोडके, मनोहर शिंदे, सुनिल आहेर, चंद्रकात गवळी, प्रकाश महाजन, परमेश्वर दराडे, वाल्मिक चव्हाण अंमलदार महेश खांडबहाले, तेजस मते, प्रविण वानखेडे, संजय पोटींदे, सुनिल खैरणार तसेच युनिट १ चे अंमलदार विलास चारोस्कर नितीन जगताप,आप्पा पानवळ आदींच्या पथकाने केली.
……….
