नाशिक (इंडिया दर्पण वृत्तसेवा)- गोविंदनगर येथील एकाच इमारतीत झालेल्या दोन घरफोडीत चोरट्यांनी सुमारे तीन लाखाच्या ऐवजावर डल्ला मारला. त्यात १ लाखाच्या रोकडसह सोन्याचांदीच्या दागिन्यांचा समावेश आहे. याप्रकरणी मुंबईनाका पोलीस ठाण्यात गुन्हा दाखल करण्यात आला आहे.
रविंद्र काशिनाथ घुमे (रा.आवारे हॉस्पिटल समोर गोविंदनगर) यांनी याबाबत फिर्याद दिली आहे. घुमे व शेजारी राहणारे विजय बाळासाहेब राऊळकर यांचे कुटुंबिय २१ ते २३ एप्रिल दरम्यान बाहेरगावी गेले असता ही घटना घडली. अज्ञात चोरट्यांनी घुमे आणि राऊळकर यांचे घर फोडून बेडरूमधील कपाटात ठेवलेल्या रोकडसह सोन्याचांदीचे दागिणे असा २ लाख ९२ हजार २८९ रूपयांचा ऐवज चोरून नेला. अधिक तपास जमादार सोनार करीत आहेत.
