नाशिक (इंडिया दर्पण वृत्तसेवा)- पोलीसांनी वेगवेगळय़ा भागात छापे टाकत गावठी कट्टे बाळगणा-या तीघांना बेड्या ठोकल्या. या कारवाईत कारसह चार गावठी कट्टे आणि जीवंत काडतुसे हस्तगत करण्यात आली असून याप्रकरणी उपनगर व इंदिरानगर पोलीस ठाण्यात गुन्हे दाखल करण्यात आले आहेत. ही कारवाई शहर गुन्हे शाखेच्या युनिट २ आणि गुंडा विरोधी पथकाने केली.
पोलीसांनी दिलेल्या माहितीनुसार उपनगर येथील वैभव लक्ष्मी लॉन्स व बॅक्वेट हॉल परिसरात फिरणा-या तरूणाकडे पिस्तूल असल्याची माहिती युनिट २ च्या पथकास मिळाली होती. त्यानुसार बुधवारी (दि.२९) सायंकाळच्या सुमारास पथकाने धाव घेत युवराज अनिल निकम (२४ रा.कोणार्क नगर,बालाजी चौक,शिक्षक कॉलनी आडगाव) या युवकाच्या मोतीराम आढाव चौकात मुसक्या आवळल्या. संशयिताच्या अंगझडतीत देशी बनावटीच्या पिस्तूलसह जीवंत काडतुसे मिळून आले असून याबाबत युनिटचे अंमलदार संजय पोटींदे यांनी फिर्याद दिली आहे.
दुसरी कारवाई गुंडा विरोधी पथकाने लॅमरोड भागात केली. पथकाचे अंमलदार अक्षय गांगुर्डे यांनी फिर्याद दिली आहे. विहीतगाव येथील महाराजा बसस्टॉप भागात एका तरूणाकडे पिस्तूल असल्याची माहिती पोलीसाना मिळाली होती. त्यानुसार गुरूवारी (दि.३०) रात्री पथकाने धाव सोमेश्वर उत्तम हंगरगे (२७ रा.स्वागत ए बिल्डींग महाराजा बस स्टॉप विहीतगाव) या संशयितास बेड्या ठोकल्या. हंगरगे याच्या अंगझडतीत लोखंडी पिस्तूलसह काडतुसे मिळून आले आहे. दोघा घटनांप्रकरणी उपनगर पोलीस ठाण्यात वेगवेगळे गुन्हे दाखल करण्यात आले असून अधिक तपास उपनिरीक्षक गोसावी व हवालदार बरेलीकर करीत आहेत.
तिसरी कारवाई इंदिरानगर भागात करण्यात आली. समर्थनगर भागातील प्रथमेश अपार्टमेंटच्या पार्किंगमध्ये लावलेल्या कारमध्ये पिस्तूल असल्याची माहिती युनिट २ च्या पथकास मिळाली होती. त्यानुसार बुधवारी (दि.२९) सायंकाळी पथकाने धाव घेत पार्किंगमधील वाहनाची तपासणी केली असता एमएच ०४ सीझेड ०७२५ या सेट्रोकारच्या मागील सिटावर दोन पिस्तूल आणि आठ जीवत काडतुसे आढळून आले. या कारवाईत कारसह पिस्तूल आणि काडतुसे असा सुमारे ३ लाख ८ हजार रूपये किमतीचा मुद्देमाल हस्तगत करण्यात आला आहे.याप्रकरणी युनिटचे हवालदार मनोज परदेशी यांनी दिलेल्या फिर्यादीवरून ध्रुपकरण रामलगन चौधरी (४६ मुळ रा. उत्तरप्रदेश हल्ली प्रथमेश अपा.जगन्नाथ चौक,समर्थनगर इंदिरानगर) यांच्याविरूध्द इंदिरानगर पोलीस ठाण्यात शस्त्रबंदी कायद्यान्वये गुन्हा दाखल करण्यात आला आहे. अधिक तपास सहाय्यक निरीक्षक सनार करीत आहेत.
