नाशिक (इंडिया दर्पण वृत्तसेवा)- पार्क केलेल्या कारमधून चोरट्यांनी पर्ससह बॅगा चोरून नेल्या. या घटनेत पर्समधील रोकडसह दागिणे व बॅगांमधील कपडे असा सुमारे ६७ हजाराचा ऐवज भामट्यांनी लांबविला असून याप्रकरणी आडगाव पोलीस ठाण्यात चोरीचा गुन्हा दाखल करण्यात आला आहे.
अमोल पांडूरंग भागवत (रा.बुधवार पेठ पुणे) यांनी फिर्याद दिली आहे. भागवत कुटुंबिय गेल्या गुरूवारी (दि.७) शहरात आले होते. परतीच्या प्रवासापूर्वी कुटुंबिय स्वामी नारायण मंदिरात देवदर्शनासाठी गेले होते. भागवत यांच्या मेहूण्यांनी कन्नमवार ब्रिज परिसरातील केवडीबनात आपली अल्टो कार एमएच १५ सीएम ०६८६ पार्क केली असता ही घटना घडली.
अज्ञात चोरट्यांनी कारच्या पाठीमागील दरवाजाची काच उघडून पर्ससह कपड्यांची बॅग चोरून नेली. पर्समध्ये १५ हजाराच्या रोकडसह ४५ हजार रूपये किमतीचे सोन्यांचांदीचे दागिणे होते. अधिक तपास जमादार जाधव करीत आहेत.
