नाशिक (इंडिया दर्पण वृत्तसेवा)- स्टोअर रूम फोडून चोरट्यांनी सुमारे १ लाख ६४ हजाराचे वायर बंडल चोरून नेले. ही घटना आगर टाकळी शिवारातील बिष्णोई प्लाझा भागात घडली. याप्रकरणी उपनगर पोलीस ठाण्यात गुन्हा दाखल करण्यात आला आहे.
भुषण सुरेश देवरे (रा.श्रीकृष्ण अव्हेन्यू,बनकर चौक काठेगल्ली) यांनी याबाबत फिर्याद दिली आहे. देवरे यांच्या नवीन साईटचे काम मुक्ताई हॉस्पिटल परिसरात चालू आहे. या साईटवरील स्टोअररूमच्या दरवाजाचे कुलू तोडून चोरट्यांनी ही चोरी केली. अज्ञात चोरट्यांनी गेल्या बुधवारी (दि.७) रात्री स्टोअररूमचे कुलूप तोडून सुमारे १ लाख ६४ हजार रूपये किमतीचे वायर बंडल चोरून नेले. अधिक तपास सहाय्यक निरीक्षक चौधरी करीत आहेत.
चाकू घेऊन फिरणा-या अल्पवयीन मुलावर पोलीसांची कारवाई
नाशिक (इंडिया दर्पण वृत्तसेवा)-शाळा परिसरात चाकू घेऊन फिरणा-या अल्पवयीन मुलावर पोलीसांनी कारवाई केली. संशयिताच्या ताब्यातून धारदार चाकू हस्तगत करण्यात आला असून याप्रकरणी नाशिकरोड पोलीस ठाण्यात गुन्हा दाखल करण्यात आला आहे.
दामिनी पथकाच्या कर्मचारी सुजाता वाळूंज यानी याबाबत फिर्याद दिली आहे. सेंट फिलोमिना शाळा भागात एका मुलाकडे धारदार चाकू असल्याची माहिती नाशिकरोड दामिनी पथकाला मिळाली होती. पथकाने धाव घेत संशयितास ताब्यात घेतले असून त्याच्या ताब्यातून चाकू हस्तगत करण्यात आला आहे. अधिक तपास पोलीस नाईक गोसावी करीत आहेत.
३० वर्षीय युवकाची आत्महत्या
नाशिक (इंडिया दर्पण वृत्तसेवा)- कामटवाडा भागात राहणा-या ३० वर्षीय युवकाने गळफास लावून घेत आत्महत्या केली. सदर युवकाच्या आत्महत्येचे कारण समजू शकले नाही. याप्रकरणी अंबड पोलीस ठाण्यात मृत्यूची नोंद करण्यात आली आहे.
संतोष बाळू दोंदे (रा.गोपाल चौक कामटवाडे) असे मृत युवकाचे नाव आहे. दोंदे याने सोमवारी (दि.१२) अज्ञात कारणातून आपल्या राहत्या घरातील बेडरूममध्ये पंख्यास दोरी बांधून गळफास लावून घेतला होता. ही बाब निदर्शनास येताच काका भाऊसाहेब जाधव यांनी त्यांस तात्काळ जिल्हारूग्णालयात दाखल केले असता वैद्यकीय सुत्रांनी तपासून मृत घोषीत केले. अधिक तपास हवालदार टिळेकर करीत आहेत.
