नाशिक (इंडिया दर्पण वृत्तसेवा) – शहरात वेगवेगळया भागात पार्क केलेल्या दोन ज्युपिटर मोपेड चोरीला गेल्याच्या घटना घडल्या आहे. याप्रकरणी आडगाव आणि देवळाली कॅम्प पोलिस ठाण्यात चोरीचे गुन्हे दाखल करण्यात आले आहेत.
पहिली घटना लहवितरोड भागात घडली. पुजा छगन आचारी (रा.शिंगवे बहुला ता.जि.नाशिक) यांनी याप्रकरणी तक्रार दाखल केली आहे. आचारी यांचे पती गेल्या शनिवारी (दि.१७) लहवितरोडने भगूरच्या दिशेने प्रवास करीत असतांना ही घटना घडली. अल्पशा कामानिमित्त ते शेजारी गेले असता वाटेत चावी लावलेली त्यांची ज्युपीटर एमएच १५ जेबी २९५८ दोघा चोरट्यांनी पळवून नेली. याप्रकरणी देवळाली कॅम्प पोलिस ठाण्यात गुन्हा दाखल करण्यात आला असून अधिक तपास हवालदार भोईर करीत आहेत.
दुस-या घटनेत आडगाव म्हसरूळ लिंकरोड भागात राहणारे उमंग पंकज गांधी (रा.म्हाडा कॉलनी) यांची ज्युपिटर एमएच ४७ पीडी ८४२७ गेल्या शुक्रवारी (दि.१६) रात्री त्यांच्या सोसायटीच्या पार्किंगमध्ये लावलेली असतांना चोरट्यांनी ती चोरून नेली. याप्रकरणी आडगाव पोलिस ठाण्यात गुन्हा दाखल करण्यात आला असून अधिक तपास हवालदार देवरे करीत आहेत.