नाशिक (इंडिया दर्पण वृत्तसेवा) – २९ वर्षीय तरूणाने गळफास लावून आत्महत्या केल्याची घटना औद्योगीक वसाहतीतील शिवाजीनगर भागात घडली. चिंतामण काळू राऊतमाळे (रा.मामाची गिरणी समोर,कृष्ण मंदिराजवळ कार्बननाका) असे मृत युवकाचे नाव आहे. चिंतामनच्या आत्महत्येचे कारण समजू शकले नाही. याप्रकरणी सातपूर पोलिस ठाण्यात मृत्यूची नोंद करण्यात आली आहे.
राऊतमाळे यांनी बुधवारी (दि.२१) पहाटेच्या सुमारास आपल्या राहत्या घरातील किचनमध्ये अज्ञात कारणातून लोखंडी अ‍ॅगलला दोरी बांधून गळफास लावून घेतला होता. ही बाब निदर्शनास येताच पत्नी योगिता राऊतमाळे यांनी त्यांना तात्काळ जिल्हा रूग्णालयात दाखल केले असता वैद्यकीय सुत्रांनी त्यास मृत घोषीत केले. अधिक तपास पोलिस नाईक वाघमारे करीत आहेत.
चोरीच्या संशयातून कामगारावर हल्ला
नाशिक पुणे मार्गावरील दत्तमंदिर सिग्नल भागात मोबाईल चोरीच्या संशयातून हातगाडीवर झोपलेल्या इसमाच्या डोक्यात एकाने सिमेंटचा गट्टू मारल्याची घटना घडली. याघटनेत सदर व्यक्ती गंभीर जखमी झाला असून, याप्रकरणी उपनगर पोलिस ठाण्यात गुन्हा दाखल करण्यात आला आहे. रामभाऊ शामराव वरखेडे (४७ रा.मुकूंद अपा.बालाजी मंदिरा शेजारी,शिखरेवाडी) असे गट्टू मारणा-या संशयिताचे नाव आहे. याप्रकरणी सरला घुगे (रा.प्रकाश आंबेडकर नगर,जेलरोड) यांनी तक्रार दाखल केली आहे.
घुगे यांचे पती अनिल यादव घुगे (४९) हे बुधवारी (दि.२१) नेहमीप्रमाणे दत्तमंदिर सिग्नल भागात कामावर गेले होते. सायंकाळच्या सुमारास पटेल वाईन्स समोर ते आपल्या हातगाडीवर झोपलेले असतांना ही घटना घडली. संशयित वरखेडा याचा हरविलेला मोबाईल घुगे यांच्याकडे असल्याच्या संशयातून हा हल्ला करण्यात आला. संतप्त वरखेडे याने घुगे झोपी गेल्याची संधी साधत बाजूला पडलेला सिमेंटचा वजनी गट्टू त्यांच्या डोक्यात मारला. या घटनेत घुगे गंभीर जखमी झाले असून त्यांच्यावर उपचार सुरू आहेत. अधिक तपास उपनिरीक्षक बटूळे करीत आहेत.
