नाशिक (इंडिया दर्पण वृत्तसेवा) – आत्महत्येचे सत्र सुरुच असून गुरुवारी शहर परिसरातील वेगवेगळया भागात राहणा-या दोघा तरूणांनी आत्महत्या केली. त्यातील एकाने विषारी औषध सेवन करून तर दुस-याने गळफास लावून घेतला. दोघांच्याही आत्महत्येचे कारण स्पष्ट होवू शकले नाही. याप्रकरणी पंचवटी आणि अंबड पोलिस ठाण्यात मृत्यूच्या नोंदी करण्यात आल्या आहेत.
पहिली घटना सिडकोतील लेखानगर भागात घडली. विशाल राधेशाम शिंपी (३४ रा. लकी बॉईज होस्टेल) यांनी गुरूवारी गळफास लावून घेत आत्महत्या केली. शिंपी लकी बॉईज होस्टेल मधील रूम नं. २ येथे मासिक भाडे तत्वावर राहत होते. गुरूवारी दुपारपर्यंत ते रूमबाहेर न पडल्याने ही घटना उघडकीस आली. होस्टेलचे कर्मचारी अमित देसले यांनी दुपारच्या सुमारास रूम उघडून प्रवेश केला असता शिंपी यांनी रूममधील पंख्यास दोरी बांधून गळफास लावून आत्महत्या केल्याचे समोर आले. याबाबत देसले यांच्या खबरीवरून अंबड पोलिस ठाण्यात मृत्यूची नोंद करण्यात आली असून अधिक तपास पोलिस नाईक शिरवले करीत आहेत.
दुस-या घटनेत पंचवटीतील साईकृपानगर भागात राहणा-या रोहित प्रकाश बेलदार (२७ रा. आशिर्वाद ग्लोरी बिल्डींग) या युवकाने गुरूवारी सकाळच्या सुमारास अज्ञात कारणातून आपल्या राहत्या घरात विषारी औषध सेवन केले होते. ही बाब निदर्शनास येताच त्याचे काका अमोल कुमावत यांनी त्यास तातडीने जिल्हारूग्णालयात दाखल केले असता वैद्यकीय सुत्रांनी तपासून मृत घोषीत केले. याबाबत पंचवटी पोलिस ठाण्यात मृत्यूची नोंद करण्यात आली असून अधिक तपास पोलिस नाईक माळवाळ करीत आहेत.
nashik city crime suicide
