नाशिक (इंडिया दर्पण वृत्तसेवा) – महामार्गावरील उड्डाणपूलावर भरधाव अज्ञात वाहनाने दिलेल्या धडकेत दुचाकीस्वार युवक ठार झाल्याची घटना घडली. स्वप्निल सुभाष गुंजाळ (२६ रा.जाधव संकुल,सातपूर अंबड लिंकरोड) असे मृत युवकाचे नाव आहे. गुंजाळ शनिवारी (दि.११) द्वारकाकडून आडगावच्या दिशेने आपल्या दुचाकीवर एमएच १५ ईवाय ९३२२ उड्डाणपूलावरून प्रवास करीत असतांना हा अपघात झाला. महामार्गावरील तपोवन क्रासिंग भागातील पंचवटी एसटी डेपो समोर पाठीमागून भरधाव आलेल्या अज्ञात वाहनाने दुचाकीस जोरदार धडक दिली. या अपघातात जखमी गुंजाळ याचा मृत्यू झाला असून याप्रकरणी त्याचे वडिल सुभाष गुंजाळ यांनी दिलेल्या तक्रारीवरून पंचवटी पोलिस ठाण्यात अपघाताची नोंद करण्यात आली आहे. पोलिस वाहनासह पसार झालेल्या चालकाचा शोध घेत आहेत. अधिक तपास उपनिरीक्षक माळी करीत आहेत.
