नाशिक : शहरात मोटारसायकल चोरीची मालिका सुरूच असून वेगवेगळय़ा भागातून नुकत्याच तीन दुचाकी चोरट्यांनी चोरून नेल्या. याप्रकरणी गंगापूर,सातपूर व उपनगर पोलिस ठाण्यात नोंदी करण्यात आल्या आहेत. मुळचे शिरपूर जि.धुळे येथील सागर भालेराव पाटील (रा.श्रमिक हौ.सोसा.एसटी कॉलनी,गंगापूर) या युवकाची शाईन मोटारसायकल एमएच १८ बीबी ३१२८ गेल्या २६ जून रोजी रात्री राहत असलेल्या श्रमिक सोसायटीच्या पार्किंगमध्ये लावलेली असतांना ती चोरट्यांनी चोरून नेली. याप्रकरणी गंगापूर पोलिस ठाण्यात गुन्हा दाखल करण्यात आला असून अधिक तपास पोलिस नाईक मोरे करीत आहेत. दुसरी घटना औद्योगीक वसाहतीत घडली. प्रदिप कारभारी आहिरे (रा.राधाकृष्णनगर,अशोकनगर) हे गेल्या १५ जून रोजी दुपारच्या सुमारास महिंद्रा कंपनी परिसरात गेले होते. एमक्यूएस गेट भागात त्यांनी आपली शाईन एमएच १५ एके ४७४७ पार्क केली असता ती चोरट्यांनी पळवून नेली. याप्रकरणी सातपूर पोलिस ठाण्यात चोरीचा गुन्हा दाखल करण्यात आला असून अधिक तपास हवालदार सुर्यवंशी करीत आहेत. तर प्रांजल सतिश चंद्रमोरे (रा.धनराजनगर,सैलानी बाबा स्टॉप,जेलरोड) यांची पल्सर एमएच १५ ईटी ००५४ बुधवारी (दि.६) रात्री त्यांच्या घरासमोर पार्क केलेली असतांना चोरट्यांनी ती चोरून नेली. याप्रकरणी उपनगर पोलिस ठाण्यात गुन्हा दाखल करण्यात आला असून अधिक तपास पोलिस नाईक कोल्हे करीत आहेत.
मोटारसायकल चोरीची मालिका सुरुच; वेगवेगळय़ा भागातून तीन दुचाकी चोरीला
