नाशिक (इंडिया दर्पण वृत्तसेवा) – महिंद्रा अँड महिंद्रा कंपनीत बनावट ओळखपत्र तयार करुन अनाधिकृत प्रवेश करणा-या महिलेविरुध्द सातपूर पोलिस स्थानकात गुन्हा दाखल करण्यात आला आहे. या महिलेला हे बनावट ओळखपत्र बनवून देणा-याविरुध्द सुध्दा पोलिसांनी कारवाई केली आहे.
या घटनेबाबत पोलिसांनी दिलेली माहिती अशी की, संशयित आरोपी सपना रामनाथ वैद्य (३०) या कंपीनीच्या कंपनीच्या प्रवेशद्वारावर बुधवारी सकाळी पावणे अकरा वाजता आल्या. येथे त्यांनी मुलांना कामासाठी भरती करावयाचे असल्याचे सांगितले. त्यानंतर बनावट ओळखपत्राच्या आधारे अनधिकृत प्रवेश करण्याचा प्रयत्न केला. यावेळी सुरक्षारक्षकांना संशय आल्याने त्यांनी ओळखपत्राची पडताळणी केली. या पडताळणीत ओळखपत्र बनावट असल्याचे समोर आले. त्यानंतर या महिलेची चौकशी केल्यानंतर हे ओळखपत्र संशयित सचिन सुरेश जाधव (३५, रा. सुकेणे, ता. निफाड) व सुनील भंडारी यांनी बनवून दिल्याचेही समोर आले. त्यानंतर सातपूर पोलीस ठाण्यात संशयित महिलेसह इतर दोघांविरोधात गुन्हा दाखल करण्यात आला आहे.
