निफाड (इंडिया दर्पण वृत्तसेवा) – निफाड परिसरात पावसामुळे घराची भिंत कोसळल्याने एका महिलेला मृत्यू झाला.
गुरुवारी पहाटेच्या सुमारास निफाड तालुक्यातील कोठुरे येथील रहिवासी बाळासाहेब पंढरीनाथ ससाने हे आपली पत्नी सौ. लताबाई ससाने यांच्यासह घरामध्ये झोपलेले असताना अचानकपणे घराची भिंत कोसळली. या भिंतीच्या ढिगार्‍याखाली दबून जाऊन त्यांची पत्नी सौ.लताबाई ससाने (५५) यांचा दुर्दैवी मृत्यू झाला. घराची भिंत कोसळल्याचे आणि ढिगार्‍याखाली महिला दाबल्या गेल्याचे लक्षात येताच आजूबाजूच्या नागरिकांनी तातडीने जेसीबी मशीन बोलावून सदर भिंतीचा ढिगारा बाजूला करण्यासाठी प्रयत्न केले, परंतु या महिलेचे प्राण वाचू शकले नाही. ऐन दिवाळीमध्ये या कुटुंबावर कोसळलेल्या दुर्दैवी प्रसंगामुळे परिसरात हळहळ व्यक्त होत आहे. याप्रकरणी निफाड पोलीस ठाण्यामध्ये आकस्मित मृत्यूची नोंद करण्यात आली असून अधिक तपास सुरू आहे.
