नाशिक (इंडिया दर्पण वृत्तसेवा) –नाशिक पुणे मार्गावरील शिवाजीनगर भागात स्त्याच्या कडेला कारजवळ उभ्या असलेल्या पुण्याच्या महिलेच्या गळयातील ६० हजाराचा राणीहार दुचाकीस्वार भामट्यांनी ओरबाडून नेला. या चोरीप्रकरणी मिनल रितकिरण तारगे (६६ रा.सिंहगड,पुणे) यांनी तक्रार दाखल केली असून उपनगर पोलिस ठाण्यात जबरीचोरीचा गुन्हा दाखल करण्यात आला आहे. तारगे २३ सप्टेंबर रोजी आपल्या कुटुंबियांसह शहरात आल्या होत्या. काम आटोपून सायंकाळच्या सुमारास तारगे कुटुंबिय परतीच्या प्रवासास लागले असता ही घटना घडली होती. नाशिक पुणे मार्गावरील शिवाजीनगर भागात तारगे कुटुंबिय क्वालिटी इन रेजीन्सी हॉटेल येथे जेवणाचे पार्सल घेण्यासाठी थांबले असता ही जबरीचोरी झाली होती. मुलगा व जावई जेवण घेण्यासाठी हॉटेलमध्ये गेले असता मिनल तारगे या रस्त्याच्या कडेला लावलेल्या आपल्या कारजवळ उभ्या होत्या. नाशिकरोडच्या दिशेने जाणा-या दुचाकीस्वारांनी त्यांच्या गळयातील सुमारे ६० हजार रूपये किमतीचा राणीहार हिसकावून नेला. अधिक तपास उपनिरीक्षक पाटील करीत आहेत.
