भरधाव चारचाकीने दिलेल्या धडकेत १६ वर्षीय युवकाचा मृत्यू

नाशिक : नाशिक पुणे मार्गावरील पळसे गाव भागात भरधाव चारचाकीने दिलेल्या धडकेत १६ वर्षीय युवकाचा मृत्यू झाला. विवेक श्रीनिवास मोरे (रा.हरिओम प्लाझा,जीएमडी कॉलेज मागे,सिन्नर) असे अपघातात ठार झालेल्या युवकाचे नाव आहे. वडिल श्रीनिवास मोरे व विवेक मोरे हे बापलेक गुरूवारी (दि.११) कामानिमित्त शहरात आले होते. काम आटोपून बापलेक आपल्या दुचाकीने सिन्नरच्या दिशेने प्रवास करीत असतांना हा अपघात झाला. नाशिक पुणे मार्गावरील पळसे गावाजवळ पाठीमागून भरधाव आलेल्या अज्ञात चारचाकी वाहनाने दुचाकीस धडक दिली. या अपघातात विवेक मोरे गंभीर जखमी झाला होता. वडिल श्रीनिवास मोरे यांनी त्यास तात्काळ जिल्हा रूग्णालयात दाखल केले असता वैद्यकीय सुत्रांनी मृत घोषीत केले. याप्रकरणी नाशिकरोड पोलिस ठाण्यात मृत्यूची नोंद करण्यात आली आहे. अधिक तपास पोलिस नाईक पवार करीत आहेत.