नाशिक (इंडिया दर्पण वृत्तसेवा) – देवळाली कॅम्प पोलिसांनी तीन दुचाकी चोरांना गजाआड केले असून त्यांनी अनेक चोरीच्या गुह्यांची कबुली दिली आहे. या चोरांकडून पोलिसांनी नऊ दुचाकींसह तीन रेसर सायकली असा सुमारे १ लाख ७४ हजार रूपये किमतीचा मुद्देमाल जप्त केला आहे.किरण राजू गांगुर्डे (१९ रा.वरचे चुचाळे,अंबड), गौरव गणेश लहामटे (२४ रा.टाकेद बु.ता.इगतपुरी) व गणेश आनंदा गुप्ता (रा.खालचे चुंचाळे,अंबड) अशी अटक करण्यात आलेल्या संशयितांची नावे आहे.
देवळाली कॅम्प पोलिस ठाण्याचे गुन्हे शोध पथकाने गेल्या मंगळवारी (दि.२५) भगूर येथे सापळा लावल्याने संशयित पोलिसांच्या हाती लागले. विनानंबर मोटारसायकलस्वार परिसरात संशयास्पद फिरत असल्याच्या माहितीवरून पोलिसांनी धाव घेत किरण गांगुर्डे याच्या अहुजा कॉम्प्लेक्स भागात मुसक्या आवळल्या. चौकशीत त्याने अंबड दत्तनगरसह जिह्यातून दोन्ही साथीदारांच्या मदतीने अनेक चो-या केल्याची कबुली दिली.
त्यानुसार दोघांना ताब्यात घेतले असता त्यांनी चोरीच्या नऊ दुचाकी आणि तीन रेसर सायकली असा सुमारे १ लाख ७४ हजार रूपये किमतीचा मुद्देमाल पोलिसांच्या स्वाधिन केला. त्यात पाच स्प्लेंडर दोन पॅशन आणि तीन सायकलींचा समावेश आहे. ही कारवाई वरिष्ठ निरीक्षक कुंदन जाधव यांच्या मार्गदर्शनाखाली सहाय्यक निरीक्षक प्रकाश गिते,उपनिरीक्षक संदेश पाडवी, लियाकत पठाण, हवालदार रमाकांत सिध्दपुरे, सुनिल जगदाळे, शाम कोटमे पोलिस नाईक राहूल बलकवडे, सुभाष जाधव, नितीन करवंदे, शिपाई विजय कोकणे, एकनाथ बागुल, दिपक जठार आदींच्या पथकाने केली.
