नाशिक : त्र्यंबकरोडवरील रिलायन्स पेट्रोल पंप भागात मद्याच्या धुंदीत सात जणांच्या टोळक्याने लुटमार करीत महापालिकेच्या वाहनचालकावर खूनी हल्ला केला. सरकारी वाहनातून घरी सोडले नाही या कारणातून हा हल्ला करण्यात आला. या घटनेत टोळक्याने चालकाच्या खिशातील रोकडसह सोनसाखळी बळजबरीने काढून घेत पोबारा केला असून, न्यायालयाच्या आदेशान्वये याप्रकरणी सातपूर पोलिस ठाण्यात जीवे मारण्याचा प्रयत्न,सरकारी कामात अडथळा आणि लुटमारीसह विविध कलमान्वये गुन्हा दाखल करण्यात आला आहे. महेश दैत्यकर,विक्की अहिरे,विवेक निकम,योगेश देशमुख (रा.सर्व कामगारनगर), शरद रोकडे (रा.चांदशी) व त्यांचे दोन साथीदार अशी मनपा कर्मचा-यावर हल्ला करणा-या संशयितांची नावे आहे. याप्रकरणी विजय चिंधू दरेकर (रा.कामगारनगर,सातपूर) यांनी तक्रार दाखल केली आहे. दरेकर हे महापालिका कर्मचारी असून ते गेल्या २ एप्रिल रोजी रात्री सेवाबजावून शासकिय वाहन घेवून आपल्या घराकडे जात असतांना ही घटना घडली होती. रिलायन्स पेट्रोल पंपासमोर उभ्या असलेल्या परिचीतांनी वाहन अडवित त्यांना थांबविले. मद्यधुंद असलेल्या टोळक्याने आम्हा सर्वांना तू घरी सोड असा आग्रह धरला. मात्र चालक दरेकर यांनी तुम्ही दारूच्या नशेत असल्याने सरकारी वाहनातून घरी सोडता येणार नाही असे सांगितल्याने संतप्त टोळक्याने शिवीगाळ करीत तुझ्या बापाची गाडी आहे का असे म्हणत धक्काबुक्की व मारहाण केली. या घटनेत टोळक्याने दरेकर यांना पकडून ठेवले असता एका संशयिताने त्यांच्या खिशातील दोन हजाराची रोकड तर दुस-याने सोनसाखळी बळजबरीने काढून घेत पोबारा केला होता. याबाबत दरेकर यांनी पोलिसात धाव घेतली होती. मात्र दाद न मिळाल्याने त्यानी न्यायालयात तक्रार दाखल केली होती. कोर्टाच्या आदेशान्वये हा गुन्हा दाखल करण्यात आला असून अधिक तपास उपनिरीक्षक राठोड करीत आहेत.
महापालिकेच्या वाहनचालकावर खूनी हल्ला; सात जणांवर गुन्हा दाखल
