पार्क केलेल्या दुचाकीची डिक्की उघडून चोरट्यांनी ६० हजार केले लंपास
नाशिक (इंडिया दर्पण वृत्तसेवा) – दिव्या कलेक्शन समोरील मार्गावर पार्क केलेल्या दुचाकीची डिक्की उघडून चोरट्यांनी ६० हजार लंपास केले. याप्रकरणी योगेश सुरेश घेगडमल (रा.बाळकृष्णनगर,पेठरोड) यांनी तक्रार दाखल केली असून नाशिकरोड पोलिस ठाण्यात चोरीचा गुन्हा दाखल करण्यात आला आहे.
घेगडमल गुरूवारी (दि.१३) नाशिकरोड भागात पैसे घेण्यासाठी गेले होते. पैसे दुचाकीच्या डिक्कीत ठेवून ते घराकडे परतत असतांना ही घटना घडली. परिसरातील दिव्या कलेक्शन समोरील रोडवर त्यांनी आपली दुचाकी पार्क करून अल्पशा कामासाठी ते नजीकच गेले असता ही घटना घडली. अज्ञात चोरट्यांनी दुचाकीची डिक्की उघडून ६० हजाराची रोकड चोरून नेली. अधिक तपास हवालदार दराडे करीत आहेत.
बांधकाम साईटवरून ८० हजाराचे बांधकाम साहित्य चोरीला
अशोकामार्ग भागात नव्याने सुरू असलेल्या बांधकाम साईटवरून चोरट्यांनी लोखंडी प्लेटा आणि साहित्य असा सुमारे ८० हजाराचा ऐवज चोरून नेला. याप्रकरणी मुंबईनाका पोलिस ठाण्यात चोरीचा गुन्हा दाखल करण्यात आला आहे. राहूल प्रभाकर जाधव (रा.साळूंकेनगर,खुटवडनगर) यांनी तक्रार दाखल केली आहे.
जाधव बांधकाम व्यावसायीक असून त्यांची अशोका मार्ग परिसरातील व्हीआयपी कॉम्प्लेक्स भागात नवीन बांधकाम साईट सुरू आहे. सर्व्हे नं. ८५४२५ मधील प्लॉट नं. ५ मध्ये सुरू असलेल्या या साईटच्या आवारात ठेवलेल्या लोखंडी प्लेटा आणि साहित्य अज्ञात चोरट्यांनी चोरून नेले. ही घटना रविवारी (दि.९) रात्री घडली. अधिक तपास हवालदार गायकवाड करीत आहेत.
