नाशिक (इंडिया दर्पण वृत्तसेवा) – दिंडोरी रोडवरील अभिषेक स्वीट्स समोर सोमवारी भर रस्त्यात किरण गुंजाळ याची हत्या करण्यात आली होती. त्यानंतर पोलिसांनी अवघ्या दोन तासात या घटनेतील तीन हल्लेखोरोना गजाआड केले. नितीन पांडुरंग साबळे, देवा उत्तम पाटील, दीपक रामन्ना वर्धे हे अटक केल्या हल्लेखोरांचे नाव आहे. या घटनेत पोलिसांनी मानवी कौशल्य, आणि तांत्रिक कौशल्य वापरत सीसीटीव्हीचे फुटेच तपासून संशयितांचा शोध घेतला.
या घटनेत हे संशयित आरोपी गुंजाळ यांच्यावर हल्ला करुन रिक्षातून पळून गेले होते. त्यानंतर पंचवटी पोलिसांनी ७ किलोमीटर पाठलाग करुन त्यांना ताब्यात घेतले. मयत गुंजाळ आणि संशयित यांच्यामध्ये भाजी मार्केटमध्ये काम करत असताना नेहमी किरकोळ वाद होत होते. सोमवारी सायंकाळी गुंजाळ व संशयित आरोपी यांच्यात वाद झाले. या वादाचे रूपांतर हाणामारीत होऊन संशयित आरोपी यांनी किरण गुंजाळ याच्यावर धार धार शस्त्राने वार केले होते. यात गुंजाळ याचा जागीच मृत्यू झाला होता.
