नाशिक (इंडिया दर्पण वृत्तसेवा) – वडनेर पाथर्डी मार्गावर दुचाकीस्वार त्रिकुटाने टेम्पो अडवित चालकास बेदम मारहाण करून लुटल्याची घटना घडली. या घटनेत चालकाच्या खिशातील रोकड व मोबाईल बळजबरीने हिसकावून घेत टोळक्याने धुम ठोकली आहे. याप्रकरणी इंदिरानगर पोलिस ठाण्यात जबरीचोरीचा गुन्हा दाखल करण्यात आला आहे. पोलिसांनी दिलेल्या माहितीनुसार असगरअली अकबरअली अन्सारी (३३ मुळ रा.सिध्दार्थ नगर,उत्तरप्रदेश हल्ली पळसे ता.जि.नाशिक) या टेम्पो चालकाने तक्रार दाखल केली आहे. अन्सारी पळसे येथील भंगार व्यापारी चौधरी यांच्या टेम्पोवर चालक म्हणून कामास आहेत. रविवारी (दि.५) ते पाथर्डी परिसरातून भंगार गोळा करून शिंदे पळसेच्या दिशेने टेम्पो एमएच ०४ ईवाय ८८४३ घेवून जात असतांना ही घटना घडली. विहीतगाव परिसरात पाठीमागून अ‍ॅक्टीव्हावर आलेल्या त्रिकुटाने टेम्पो अडवून चालकास कट का मारला याबाबत जाब विचारला. यावेळी संतप्त दोघांनी टेम्पोच्या चालक कॅबीनमध्ये जावून चालकास बेदम मारहाण करीत त्याच्या खिशातील दहा हजाराची रोकड व मोबाईल असा सुमारे १५ हजाराचा ऐवज बळजबरीने काढून पोबारा केला. अधिक तपास पोलिस निरीक्षक वांजळे करीत आहेत.
