नाशिक (इंडिया दर्पण वृत्तसेवा) – वेगवेगळया भागात भरधाव चारचाकींनी दिलेल्या धडकेत दोन जण जखमी झाले. याप्रकरणी पंचवटी आणि उपनगर पोलिस ठाण्यात अज्ञात वाहन चालकांविरूध्द गुन्हे दाखल करण्यात आले आहेत. पहिला अपघात जयभवानीरोडवर झाला. देवळाली गावातील उमर गफार शेख (२० रा.जोशी चाळ,पाटील गॅरेज मागे) हा युवक गेल्या सोमवारी (दि.२७) सायंकाळच्या सुमारास आपल्या बुलेट एमएच १५ एफएस ६२६२ दुचाकीवर प्रवास करीत असतांना हा अपघात झाला. जयभवानीरोडने तो प्रवास करीत असतांना कदम डेअरीसमोर भरधाव आलेल्या एमएच १५ जीएक्स ६७२९ या चारचाकीने दुचाकीस धडक दिली. या घटनेत शेख याच्या दोन्ही पायांना आणि डोळ््यास दुखापत झाली असून याप्रकरणी सदर वाहनचालकाविरूध्द उपनगर पोलिस ठाण्यात गुन्हा दाखल करण्यात आला आहे. अधिक तपास जमादार माळोदे करीत आहेत. दुसरी घटना दिंडोरी नाक्याजवळ घडली. शैलेश संपत मुर्तडक (३२ रा.गल्ली नं. २ अवधूतवाडी) हे बुधवारी (दि.१) भावजयी रूपाली मुर्तडक यांच्या समवेत अवधूतवाडी येथून परिसरातील सप्तशृंगी माता मंदिराच्या दिशेने पायी जात असतांना दिंडोरीनाक्याकडून म्हसरूळच्या दिशेने भरधाव जाणा-या चारचाकीने त्यांना धडक दिली. या अपघातात शैलेश मुर्तडक गंभीर जखमी झाले असून भावजयी रूपाली मुर्तडक यांनी दिलेल्या तक्रारीवरून अपघातानंतर वाहनासह पसार झालेल्या चालकाविरूध्द गुन्हा दाखल करण्यात आला आहे. अधिक तपास पोलिस नाईक सानप करीत आहेत.
चारचाकींनी दिलेल्या धडकेत दोन जण जखमी; वेगवेगळ्या भागात झाले दोन अपघात
