नाशिक (इंडिया दर्पण वृत्तसेवा) – म्हसरूळ लिंकरोड भागात रस्त्याने पायी जाणा-या व्यक्तीस शिवीगाळ करीत मद्यपीने धारदार शस्त्राने हल्ला केल्याची घटना घडली. या घटनेत पादचारी जखमी झाला असून, याप्रकरणी म्हसरूळ पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार राहूल बाळू घुले असे पादचा-यांवर हल्ला करणा-या मद्यपीचे नाव आहे. याप्रकरणी सदानंदकुमार काशिराम यादव (४० रा.कंसारा माता चौक,बोरगड) यांनी तक्रार दाखल केली आहे. यादव रविवारी (दि.२६) म्हसरूळ लिंकरोडवरील कंन्सारा माता चौकातून आपल्या घराकडे पायी जात असतांना ही घटना घडली. पाठीमागून मद्याच्या नशेत आलेल्या संशयितांने त्यांना विनाकारण शिवीगाळ केली. यावेळी यादव यांनी संशयितास समजून सांगण्याचा प्रयत्न केला असता त्याने लाथाबुक्यांनी मारहाण करीत त्यांच्यावर धारदार शस्त्राने वार केला. या घटनेत यादव यांच्या कानाजवळ मोठी दुखापत झाली असून अधिक तपास हवालदार चव्हाण करीत आहेत.
