येवला (इंडिया दर्पण वृत्तसेवा)- राज्याचे माजी उपमुख्यमंत्री छगन भुजबळ यांच्या प्रयत्नांतून नगरसुल रेल्वे स्थानकातील कव्हर गुड्स शेडला मंजुरी मिळाली असून लवकरच या कामाला सुरुवात होणार आहे. यामुळे येवला मतदारसंघात आवक होणारी खते आणि विक्रीसाठी बाहेर पाठविला जाणारा कांदा, मका आदी शेतमालाला बिगरमोसमी पावसापासून सुरक्षितेसाठी उपयुक्त ठरणार आहे.
येवला मतदारसंघातील नगरसूल हे दक्षिण मध्य रेल्वे नांदेड विभागांतर्गत महत्त्वाचे रेल्वे स्थानक असून दक्षिण भारतात जाणाऱ्या बहुतांश रेल्वेगाड्या याच रेल्वेस्थानकातून सुटतात. त्यामुळे येवला मतदारसंघातील रेल्वे वाहतुकीच्या दृष्टीने हे महत्त्वाचे ठिकाण आहे. माजी उपमुख्यमंत्री छगन भुजबळ यांच्या प्रयत्नांतून नगरसुल येथे या अगोदरच खताचा रेक पॉइंट मंजूर करण्यात आला आहे. मात्र कव्हर गुड्स शेडचे सुविधा उपलब्ध नसल्याने अचानक येणाऱ्या बिगरमोसमी पावसामुळे खतांचे नुकसान होते. यामुळे खत कंपन्यांना खताचे रेक या ठिकाणी उतरविणे जोखमीचे ठरत होते. या अनुषंगाने मतदारसंघातील शेतकरी बांधवांच्या हिताच्या दृष्टीने या ठिकाणी कव्हर गुड्स शेड मंजूर करण्याची मागणी राज्याचे माजी उपमुख्यमंत्री छगन भुजबळ यांनी दि.२३ ऑगस्ट २०२४ रोजी दक्षिण मध्य रेल्वेचे जनरल मॅनेजर अरुणकुमार जैन यांना पत्र लिहून केली होती.
या मागणीला सकारात्मक प्रतिसाद देत नगरसूल येथे कव्हर गुड्स शेडचे मंजूर करण्यात आले आहे. याबद्दल केंद्रीय रेल्वेमंत्री अश्विनी वैष्णव आणि महाप्रबंधक अरुणकुमार जैन यांचे माजी उपमुख्यमंत्री छगन भुजबळ यांनी आभार मानले आहे.
येवला मतदारसंघातील रेल्वेस्थानकांमध्ये खतांची आवक होण्यासाठी सुरक्षित बंदिस्त जागा म्हणजेच कव्हर गुड्स शेडची उपलब्धता नसल्याने येवला-लासलगावसाठी येणारी खते मनमाड व नांदगाव येथे उतरवली जात होती. तेथून रस्तामार्गे वाहतूक करून ती येवला व परिसरात आणली जात होती. परिणामी वाहतूक खर्चासह अन्य खर्च समाविष्ट झाल्याने शेतकऱ्यांना देखील खते वाढीव दराने घ्यावी लागत होती. या कव्हर गुड्स शेडच्या मंजुरीमुळे खतांची आवक थेट येवला तालुक्यात होणार आहे. तसेच परिसरातील महत्वाचे पिक असलेला कांदा व मका या शेतमालाची सुरक्षितपणे साठवण करणे शक्य होणार असून बिगरमोसमी पावसापासून होणारे नुकसान टाळले जाणार आहे.
यासाठीची निविदा काढण्यात आली असून दक्षिण मध्य रेल्वे नांदेड विभागाचे मंडल रेल्वे प्रबंधक प्रदीप कामले यांनी नगरसूल रेल्वे स्थानक येथे दि. ८ एप्रिल २०२५ रोजी प्रत्यक्ष भेट देऊन कव्हर गुड्स शेडच्या जागेची पाहणी देखील केली आहे. त्यामुळे लवकरच या कामाला सुरुवात होणार आहे.
