इंडिया दर्पण ऑनलाईन डेस्क – छोट्या पडद्यावरील मालिका घराघरात रोज न चुकता आवर्जून पहिल्या जातात. त्यातील दृश्यांवर प्रेक्षक चर्चा देखील करत असतात. या मालिकांना जसे प्रेक्षक डोक्यावर उचलून घेतात तसेच त्याचे कथानक भरकटल्यावर प्रेक्षक त्यावर संताप व्यक्त करत तिला ट्रोल देखील करतात, असा अनुभव आहे. असाच काहीसा अनुभव सध्या ‘स्टार प्रवाह’वरील ‘मुलगी झाली हो’ या मालिकेच्या बाबतीत दिसत आहे.
सप्टेंबर २०२० मध्ये ‘स्टार प्रवाह’ वाहिनीवर ‘मुलगी झाली हो’ ही मालिका सुरु झाली. या मालिकेत सुरुवातीला विलास पाटील ही रांगडी भूमिका साकारणारे किरण माने, तर साजिरी हे निरागस मुलीचे पात्र आणि बाकी सर्वांच्याच दर्जेदार अभिनयामुळे काहीच दिवसात या मालिकेने टीआरपीत पहिल्या पाचमध्ये स्थान मिळवले. ते अनेक दिवस अबाधित राहिले. मात्र मध्यंतरी वादात सापडलेली ही मालिका आता वेगळ्या वाटेवर असल्याचे चित्र आहे. मालिकेतील साजिरी गरोदर आहे. तर साजिरीवर जीवापाड प्रेम करणारा तिचा नवरा शौनक आता तिच्या पोटातील मूल आपलं नाही म्हणत साजिरी आणि सिद्धांतवर आरोप करत आहे.
काही दिवसांपूर्वी याच वाहिनीवरील ‘रंग माझा वेगळा’ या मालिकेत देखील असेच कथानक दाखवण्यात आले होते. दीपा गरोदर असताना कार्तिक तिच्यावर आरोप करत डीएनए चाचणीची मागणी करतो. त्यानंतर रुग्णालयात दोन मुलींना जन्म दिल्यानंतर एका मुलीला सौंदर्या इनामदार आपल्याकडे ठेवतात तर दुसऱ्या मुलीला घेऊन दीपा तिला कठीण परिस्थिती वाढवते. ‘मुलगी झाली हो’ मालिका देखील अशाच ट्रॅकवर असल्याने प्रेक्षक संतापले आहेत.
एकाच वाहिनीवरील दोन वेगवेगळ्या मालिकेतील कथानक सारखे कसे असा प्रश्न प्रेक्षकांना पडला आहे. सोशल मीडियाच्या माध्यमातून प्रेक्षकांनी आपला संताप व्यक्त केला आहे. आता इकडे रंग माझा वेगळा खेळता का ? दीपाच्या जागेवर आता साजिरी का ? सगळ्या फिरून एकाच ठिकाणी असे म्हणत प्रेक्षकांनी या मालिकेला ट्रोल केले आहे. सुरवातीला टीआरपीच्या रांगेत मान मिळवणाऱ्या या मालिकेचा चुकलेला ट्रॅक आता तिला कुठल्या दिशेला नेतो आणि प्रेक्षकांचा किती अंत पाहतो हे पाहणे महत्त्वाचे ठरणार आहे.
Marathi TV Serial Mulgi Zali Ho Troll in Social Media
Entertainment Star Pravah