अभिनेत्री मानसी नाईकचा घटस्फोट होणार? अखेर तिने शेअर केली ही पोस्ट

इंडिया दर्पण ऑनलाईन डेस्क – केवळ अभिनेत्री नाही तर एक उत्तम नर्तिका म्हणून मनोरंजन विश्वात मानसी नाईक हे नाव प्रसिद्ध आहे. ‘बाई वाड्यावर या’, ‘वाट बघतोय रिक्षावाला’ अशा या गाण्यांमधून ती भलतीच लोकप्रिय झाली. नृत्य करताना तिच्या चेहऱ्यावरचे असणारे भाव, डोळ्यांची अदा यामध्ये मानसी अगदी पारंगत आहे. तिच्या नृत्य कौशल्याची कायम चर्चा होत असते. सध्या मानसी नाईकच्या वैवाहिक आयुष्यात वादळ आल्याची चर्चा आहे. काही दिवसांपूर्वी मानसीने तिचे आणि प्रदीपचे एकत्र फोटोही डिलीट केले होते. त्यानंतर तिने खरेरा हे आडनावही हटवलं आहे. यामुळे ती लवकरच घटस्फोट घेणार असल्याच्या चर्चांना उधाण आल्याचे चित्र होते. याबाबत खुद्द मानसीनेच खुलासा केला आहे.

मानसी सोशल मीडियावर सक्रिय असते. नुकतीच तिने तिच्या खासगी आयुष्याशी निगडीत पोस्ट केली आहे. यातील बहुतांश पोस्ट भावूक असल्याचे दिसते आहे. तिचे वैवाहिक आयुष्य बिघडल्याची चर्चा होती. यातच तिने एक स्टोरी पोस्ट करून यावर खुलासा केला आहे. यानुसार तिने म्हटले आहे की, आपल्या आयुष्यात अनेक मित्र येतात जे तुमच्यासाठी सतत खंबीरपणे उभे राहतात. तुम्ही जे जसे आहात, तसे ते तुम्हाला स्वीकारतात आणि त्याबद्दल त्यांच्या मनात तुमच्याविषयीच आदरच असतो. ते तुमच्यासाठी लढतात. तुम्हाला सहभागी करुन घेतात. तुम्हाला प्रोत्साहन देतात. काहीही झालं तरी ते तुमच्यासाठी खंबीरपणे उभे राहतात. पण माझ्या आयुष्यात अशी काही माणसं अपवादाने आली की ज्यांनी मित्राचा बुरखा घेतलेला होता. मात्र त्यांनी वरीलपैकी कोणतीही गोष्ट केली नाही, असे ती म्हणते.

मानसीने पुढे म्हटले आहे की, माझ्या कठीण काळात माझ्या वैयक्तिक आयुष्याच्या संदर्भातील माहितीचा कोणी गैरवाजवी उपयोग करत असेल तर कृपया त्या खोट्या माहितीवर विश्वास ठेवू नका आणि त्याकडे पूर्णपणे दुर्लक्ष करा. ही विनंती सर्वांसाठी आणि प्रसारमाध्यमांसाठी आहे”, असे मानसी नाईकने यात म्हटले आहे. मानसीने शेअर केलेली ही स्टोरी सध्या चर्चेत आहे. अनेकांना ही पोस्ट वाचून धक्का बसला आहे. तिने शेअर केलेल्या या इन्स्टाग्राम स्टोरीचा तिच्या खासगी आयुष्याशी आणि घटस्फोटाशी संबंध जोडला जात आहे. यावर मात्र तिने काहीही स्पष्टीकरण केलेले नाही.

मानसी नाईक आणि प्रदीप खरेरा यांचं लग्न १९ जानेवारी २०२१ रोजी झालं. त्याआधी काही काळ दोघंही रिलेशनशिपमध्ये होते. मानसी आणि प्रदीप सोशल मीडियावर नेहमीच सक्रिय असतात. अनेकदा ते एकमेकांबरोबरचे रोमँटिक फोटो शेअर करताना दिसत होते. पण आता दोघांनीही इन्स्टाग्रामवरून एकमेकांबरोबरचे फोटो डिलिट केले आहेत. त्यामुळे दोघांच्याही नात्यात दुरावा आल्याच्या चर्चा सुरू झाल्या आहेत.

https://www.instagram.com/p/ClDCSk4qfTO/?igshid=MDJmNzVkMjY=

Marathi Actress Manasi Naik Divorce Social Post