मनमाड (इंडिया दर्पण वृत्तसेवा) – मनमाड शहरात सध्या एकच चर्चा आहे ती म्हणजे आमदार सुहास कांदे यांच्यावतीने घराघरात वाटली जाणारी छापील बॅग आणि मिठाईचा बॉक्स. मनमाडकरांची अनेक वर्षांची मागणी पूर्ण करणारी घटना घडणार असल्याने आमदारांकडून सध्या हे वाटपसत्र सुरू आहे. त्याची सध्या केवळ मनमाड नाही तर जिल्ह्यातच चर्चा होत आहे.
मनमाड शहरासाठी अत्यंत महत्वपुर्ण समजल्या जाणा-या हिंदूहृदयसम्राट बाळासाहेब ठाकरे करंजवण-मनमाड पाणी पुरवठा योजनेचा भूमीपूजन सोहळा मुख्यमंत्री एकनाथ शिंदे यांच्या हस्ते मनमाड येथे १३ फ्रेबुवारी होणार आहे. या कार्यक्रमासाठी मुख्य़मंत्र्यांसह मंत्री येणार आहे. ३७५ कोटीची असलेल्या ही योजना १८ महिन्यात पूर्ण होणार असून सध्या ११ किमी पाईप लाईन टाकण्यात आली आहे, तर याच दिवशी तालूक्यातील अन्य कामांचे उद्घाटन मुख्यमंत्र्यांचे हस्ते ऑनलाईन करण्यात येणार आहे. याचनिमित्ताने आमदार सुहास कांदे व सौ.अंजुम कांदे यांच्या नेतृत्वात शिवसेना मनमाड शहर, युवासेना, महिला आघाडीचे सर्व पदाधिकारी व कार्यकर्ते जोमाने कामाला लागले आहेत. घरोघरी जाऊन हात जोडून नागरिकांना शुभारंभाच्या कार्यक्रमाचे निमंत्रण देत आहेत. हे निमंत्रण देतांना एक छापील बॅग व मिठाईचा बॅाक्सही दिला जात आहे. या छापील बॅगेत मनमाड- करंजवण या योजनेची माहिती, विकासाकर्याची माहिती पुस्तिका ( बदल घडतोय), आमंत्रण पत्रिक आहे. पाणीप्रश्न हा मनमाडकरांसाठी जिव्हाळ्याचा विषय आहे. त्यासाठी ही योजना पाण्याचा प्रश्न कायम स्वरुपी सोडवणारी असल्यामुळे त्याकडे सर्वांचे लक्ष आहे.
मनमाड शहर गेल्या ५० वर्षांपासून पाणी टंचाईशी झुंजत आहे. पण, येथील पाणीप्रश्नाकडे कधीही गंभीरपणे लक्ष दिले गेले नाही. पण, आ. सुहास कांदे यांनी या योजनेचा पाठपुरावा करुन ती मंजुर करुन त्याचे कामही सुरु केले. या योजनेतून शहराचा पाण्याचा प्रश्न कायमस्वरुपी सुटू शकणार आहे. रेल्वेचे मोठे जंक्शन व मध्यवर्ती ठिकाण म्हणून प्रसिद्ध असलेल्या मनमाड शहारात पाण्याचा प्रश्न हा नेहमी कळीचा मुद्दा होता. सुमारे एक लाखापेक्षा जास्त लोकसंख्या असलेल्या या शहरातील नागरिकांना शहरापासून चार किमी अंतरावर असलेल्या वागदर्डी धरणातून पाणीपुरवठा केला जातो.
१९७४ साली या धरणाची निमिर्ती करण्यात आली. त्यावेळी शहराची लोकसंख्या सुमारे तीस ते चाळीस हजार होती. त्यामुळे लोकांना रोज पाणी मिळत होते. कालांतराने शहराची लोकसंख्या वाढत गेल्यामुळे १९८७ साली पालखेड धरणातून सुमारे ९ कोटी रुपये खर्चाची पाणीपुरवठा योजना मंजूर होऊन सुरू झाली. पालखेड धरणातून रोटेशनद्वारे पाटोदा साठवणूक तलावात पाणी घेतले जाते. तेथून पंपिंग करुन सदर पाणी वागदर्डी धरणात आणल्यानंतर शहरात वितरीत केले जाते. वागदर्डी धरणाची अगोदर ९० दशलक्ष घनफूट क्षमता होती. त्यानंतर सांडव्याची भिंत वाढविण्यात आल्यामुळे धरणाची क्षमता ११० दशलक्ष घनफूट झाली.
असे असले तरी धरण बांधल्यापासून त्याच्यातून गाळ काढण्यात आला नाही. तर धरणाऱ्या पाणलोट क्षेत्राच्या स्त्रोताच्या ठिकाणीच अनेक गावात पाझर तलाव बांधण्यात आल्यामुळे हे धरण लवकर भरतच नाही. त्यामुळे ७४ किमी अंतरावर असलेल्या पालखेड डाव्या कालव्यातून मनमाडच्या धरणाला पाणी रोटेशनद्वारे मिळते या पाण्यावरच शहराला पूर्णपणे अवलंबून रहावे लागते. पण, आता या योजनेमुळे थेट पाणी मिळणार आहे.
रेल्वेचे जंक्शन, आशिया खंडातील दुसऱ्या क्रमांकाचे भारतीय अन्न महामंडळाचे धान्य साठवण ठेवणारे डेपो, ऐतिहासिक रेल्वे वर्कशॉप, विविध ऑईल कंपन्यांचे प्रकल्प, आणि शीख धर्मियांच्या सुप्रसिद्ध गुरुद्वारेमुळे मनमाड शहराची देशाच्या नकाशावर आगळीवेगळी ओळख आहे. इतक्या वेगवेगळ्या अर्थांनी प्रसिद्ध असलेले हे ठिकाण सध्या पाणीटंचाईचे माहेरघर म्हणूनही या शहराला ओळखले जाते. पण, पाण्यामुळे शहराचा विकास खुंटला होता. पण, आता या योजनेमुळे विकासाला चालणा मिळणार आहे. त्यामुळे या महत्वपूर्ण योजनेचे भूमीपूजन मुख्यमंत्री एकनाथ शिंदे यांच्या हस्ते होणार आहे. त्यासाठी हे निमंत्रण घरोघरी दिले जात आहे.
