मनमाड (इंडिया दर्पण वृत्तसेवा) – मध्यमवर्गीय व एकत्र कुटुंबाशी समरस झालेल्या कवयित्री विनया काकडे यांच्या कवितांमधून स्त्री जीवनाच्या विविध पैलूंचे दर्शन घडते, तसेच त्यांच्या कवितासंग्रहातून स्त्रियांचे भावविश्व समर्थपणे वाचकांसमोर प्रकटते असे प्रतिपादन साहित्यिक,पत्रकार डॉ विनोद गोरवाडकर यांनी केले.
शनिवारी कवयित्री विनया विकास काकडे यांच्या माझिया मना या सिद्धी प्रकाशन प्रकाशित पुस्तकाच्या प्रकाशन सोहळ्यात ते अध्यक्षपदावरून बोलत होते. यावेळी व्यासपीठावर वक्त्या डॉ प्रा धनश्री साने, प्रकाशक साहित्यिक संदीप देशपांडे, कवयित्री विनया काकडे आदी उपस्थित होते. यावेळी डॉ गोरवाडकर यांनी ग्रामीण भागातुन साहित्य निर्मिती होणे ही विशेष बाब असल्याचे सांगत पुस्तकाचे कौतुक केले. सुनीताताई देशपांडे, डॉ सुधा मुर्ती यांनी जपलेल्या सामाजिक जाणिवेचे दाखले देत त्यांनी काकडे परिवाराच्या सामाजिक बांधिलकीचा गौरव केला. प्रमुख वक्त्या डॉ धनश्री साने यांनी माझिया मना काव्यसंग्रहातुन विनया काकडे यांनी विविध विषयांना स्पर्श केल्याचे सांगत कवितांबद्दल गौरवोद्गार काढले. त्यांचा कथासंग्रह लवकरच यावा अशी अपेक्षा त्यांनी यावेळी व्यक्त केली.
प्रकाशक संदीप देशपांडे यांनी पुस्तक निर्मितीचा प्रवास उलगडला. आनंद काकडे यांनी प्रास्तविक केले. पाहुण्यांसह अनिल काकडे, विकास काकडे यांच्या हस्ते पुस्तक प्रकाशन झाले. कवयित्री विनया काकडे यांनी मनोगतातून काव्य लेखनाचा प्रवास मांडला. अभिनेते शिवाजी शिंदे, रुपाली कुलकर्णी यांनी पाहुण्यांचा परिचय करून दिला. मेघा काकडे यांनी काव्यसंग्रहातील कवितांचे वाचन केले. पत्रकार स्वाती गुजराथी यांनी भाषणातून काकडे परिवाराच्या कार्याचा आढावा घेतला. जनार्दन देवरे यांनी सूत्रसंचालन केले तसेच कवी प्रदीप गुजराथी यांनी आभार मानले. संजय काकडे, श्रीपाद देव, मयुरी काकडे, मेघा काकडे यांच्या हस्ते मान्यवरांचा सत्कार करण्यात आला. काकडे परिवाराने संयोजन केले.
