मुंबई – दिवाळी सणाच्या काळात अनेक वाहन कंपन्यांनी ग्राहकांसाठी मोठी सूट जाहीर केली होती. या संधीचा फायदा घेत अनेकांनी वाहन खरेदी केले. मागील वर्षी कोरोना काळात कारसह अनेक चारचाकी वाहन उत्पादकांना मोठा फटका बसला होता. परंतु यंदा मात्र अनेक वाहन कंपन्या ग्राहकांना आपल्याकडे आकर्षित करण्यासाठी वेगवेगळ्या योजना आखत आहेत.
महिंद्रा अँड महिंद्रा ही देशातील आघाडीची वाहन निर्माता कंपनी असून ही कंपनी आपल्या निवडक वाहनांवर मोठ्या प्रमाणात सूट देत आहे. या महिन्यात म्हणजे नोव्हेंबरमध्ये ग्राहकांना सदर कंपनीच्या वाहनांवर 81,500 रुपयांपर्यंत सूट मिळू शकते. या सवलतींमध्ये रोख सवलत, विनिमय लाभ, कॉर्पोरेट सूट आणि अतिरिक्त ऑफर यांचा समावेश आहे. विशेष म्हणजे ग्राहकांना या ऑफरचा लाभ दि.30 नोव्हेंबरपर्यंत घेता येईल. आता जाणून घेऊ या महिंद्राच्या कोणत्या वाहनावर किती सूट मिळत आहे…
महिंद्रा KUV100- NXT आणि स्कॉर्पिओ
कंपनीच्या महिंद्रा KUV100 NXT SUV वर एकूण 61,055 रुपयांपर्यंत सूट मिळत आहे. यामध्ये 38,055 रुपयांपर्यंत रोख सूट, 20 हजार रुपयांपर्यंतचा एक्सचेंज बोनस आणि 3,000 रुपयांपर्यंतच्या कॉर्पोरेट ऑफरचा समावेश आहे. त्याचप्रमाणे महिंद्रा स्कॉर्पिओ एसयूव्हीवर 32,320 रुपयांपर्यंत सूट दिली जात आहे. यामध्ये 15 हजार रुपयांपर्यंतचे एक्सचेंज फायदे, 4 हजार रुपयांपर्यंत कॉर्पोरेट ऑफर आणि 13,320 रुपयांपर्यंतच्या अतिरिक्त ऑफरचा समावेश आहे.
महिंद्रा Alturas G4 आणि XUV300
महिंद्रा Alturas G4 SUV या दोन वाहनांवर 81,500 रुपयांपर्यंत सूट मिळत आहे. यामध्ये 50 हजार रुपयांपर्यंतचा एक्सचेंज बोनस, 11,500 रुपयांपर्यंत कॉर्पोरेट ऑफर आणि 20 हजार रुपयांपर्यंतच्या इतर ऑफरचा समावेश आहे. त्याचप्रमाणे कंपनीच्या XUV300 subcompact SUV वर 49 हजार रुपयांपर्यंत सूट मिळत आहे. यामध्ये 15 हजार रुपयांपर्यंतच्या रोख ऑफर, 25 हजार रुपयांचा एक्सचेंज बोनस, 4,500 रुपयांपर्यंत कॉर्पोरेट सूट आणि 5 हजार रुपयांपर्यंतच्या इतर ऑफरचा समावेश आहे.
महिंद्रा मराझो आणि बोलेरो
महिंद्रा मराझो MPV वर 40,200 रुपयांपर्यंत सूट दिली जात आहे. नोव्हेंबरमध्ये या MPV वर ग्राहक 20 हजार रुपयांपर्यंत रोख सवलत, 15 हजार रुपयांपर्यंतचे एक्सचेंज फायदे आणि 5,200 रुपयांपर्यंतच्या कॉर्पोरेट ऑफरचा लाभ घेऊ शकतात. त्याचप्रमाणे महिंद्राच्या लोकप्रिय बोलेरो एसयूव्हीवर 13 हजार रुपयांची सूटही उपलब्ध आहे. यामध्ये 10 हजार रुपयांपर्यंतची एक्सचेंज ऑफर आणि 3 हजार रुपयांपर्यंतची कॉर्पोरेट ऑफर समाविष्ट आहे. त्यामुळे ग्राहकांना मोठी संधी उपलब्ध झाली आहे.
