इयत्ता बारावीचा निकाल जाहीर… यंदाही मुलींचीच बाजी… हा विभाग सर्वप्रथम

पुणे (इंडिया दर्पण वृत्तसेवा) – महाराष्ट्र राज्य माध्यमिक आणि उच्च माध्यमिक शिक्षण मंडळातर्फे फेब्रुवारी-मार्च २०२३मध्ये घेण्यात आलेल्या इयत्ता बारावी परीक्षेचा निकाल जाहीर करण्यात आला आहे. यंदाही मुलींनीच बाजी मारली आहे. राज्याचा निकाल ९१.३५ टक्के लागला आहे. आज दुपारी २ वाजता विद्यार्थ्यांना हा निकाल ऑनलाईन पद्धतीने पाहता येणार आहे.

महाराष्ट्र राज्य माध्यमिक व उच्च माध्यमिक शिक्षण मंडळाचे अध्यक्ष शरद गोसावी यांनी पत्रकार परिषद घेत आज हा निकाल जाहीर केला आहे. यंदाच्या निकालात ९३.७३ टक्के मुली उत्तीर्ण झाल्या आहेत. तर, मुलांचे प्रमाण ८९.१४ टक्के एवढे आहे. राज्यात एकूण १४,१६,३७१ विद्यार्थ्यांनी परीक्षा दिली होती. त्यापैकी १२,९२,४६८ विद्यार्थी उत्तीर्ण झाले आहेत.

दृष्टीक्षेपात निकाल असा
मुलींची उत्तीर्ण होण्याची टक्केवारी ९३.७३
मुलांची उत्तीर्ण होण्याची टक्केवारी ८९.१४
पुनर्परीक्षार्थी विद्यार्थ्यांच्या (रिपीटर) निकालाची टक्केवारी ४४.३३ टक्के
खाजगी विद्यार्थ्यांच्या निकालाची टक्केवारी  ८२.३९ टक्के
दिव्यांग विद्यार्थ्यांच्या निकालाची टक्केवारी  ९३.४३ टक्के

विभागनिहाय निकाल असा
कोकण : ९६.०१
पुणे : ९३.३४
कोल्हापूर : ९३.२८
अमरावती : ९२.७५
औरंगाबाद : ९१.८५
नाशिक : ९१.६६
लातूर : ९०.३७
नागपूर : ९०.३५
मुंबई : ८८.१३

दुपारी २ वाजता निकाल
महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळांमार्फत फेब्रुवारी-मार्च २०२३ मध्ये घेण्यात आलेल्या उच्च माध्यमिक प्रमाणपत्र (इयत्ता १२ वी) परीक्षेचा निकाल आज दुपारी २ वाजता ऑनलाईन जाहीर करण्यात येणार आहे.

खालील वेबसाईटवर निकाल पाहता येईल
www.mahresult.nic.in
www.hscresult.mkcl.org
https://hsc.mahresults.org.in

परीक्षेस प्रविष्ट झालेल्या सर्व विद्यार्थ्यांचे विषयनिहाय गुण वरील संकेतस्थळांवरुन उपलब्ध होतील. याची छापील प्रत (प्रिंट ऑऊट) घेता येतील. अनिवार्य विषयांपैकी (श्रेणी विषयांव्यतिरिक्त) कोणत्याही विषयात संपादित केलेल्या गुणांची पडताळणी व उत्तरपत्रिकांच्या छायाप्रती, पुनर्मूल्यांकन व स्थलांतरण प्रमाणपत्रासाठी संबंधित विभागीय मंडळाकडे ऑनलाईन पध्दतीने (http://verification./mh-hsc.ac.in) अर्ज करता येईल.

यासाठीच्या सविस्तर सूचनांसाठी मंडळाच्या संकेतस्थळाला भेट देता येईल. या परीक्षेस सर्व विषयांसह प्रविष्ट होऊन उत्तीर्ण होणाऱ्या नियमित विद्यार्थ्यांसाठी लगतच्या दोनच संधी श्रेणी/ गुणसुधार (Class Improvement Scheme) योजना उपलब्ध राहील. या परीक्षेस प्रविष्ट विद्यार्थ्यांना गुणपत्रिका संबंधित उच्च माध्यमिक शाळा/ कनिष्ठ महाविद्यालयामार्फत वितरित करण्यात येतील. इयत्ता १२ वी परीक्षेसाठी सर्व शिक्षक व शिक्षकेतर कर्मचाऱ्यांचे व राज्य मंडळातील तसेच सर्व विभागीय मंडळातील अधिकारी व कर्मचारी यांनी विशेष परीश्रम घेतले आहे.

Maharashtra HSC Board Exam Result Declared