इंडिया दर्पण ऑनलाईन डेस्क
गरीब महिलांना सन्मान देण्याऐवजी त्यांची थट्टा उडवण्याचं काम महाभ्रष्टयुती सरकार करत आहे. हा तुमच्या खिशातला नाही तर, जनतेचा पैसा आहे.
भंडाऱ्यात लाडक्या बहिणींवर पोलिसांनी लाठीचार्ज केला आहे. विशेष म्हणजे हा सगळा प्रकार शासकीय कार्यालयाच्या कार्यक्रमावेळी घडला. कामगार मंत्रालयाच्या पेटी वाटप कार्यक्रमात पोलिसांनी लाठीचार्ज केला आहे. यात सहा ते सात महिला गंभीर जखमी झाल्या असल्याचा आरोप करत काँग्रेसचे प्रदेशाध्यक्ष नाना पटोले यांनी एक व्हिडिओ पोस्ट करत केला.
यावेळी ते म्हणाले देवेंद्र फडणवीसांना जर आपल्या गृहखात्याला गर्दी हाताळता येत नसेल अन् महिलांचा आदर राखता येत नसेल तर आपलं सरकार कार्यक्रमांसाठी गर्दी जमवता कशाला? लाडकी बहीण फक्त खात्यावर पैसे टाकून नाही तर, तिचा मान, सुरक्षा आणि आदर देऊन करता येते. हाच तुमचा अन् या भाजपप्रणित मिंधे सरकारचा खरा चेहरा आहे. लाडकी बहीणच्या नावानं आपण फक्त महिलांना आमिष दाखवून त्यांची मतांसाठी फसवणूक करत आहात.
या प्रश्नांची उत्तरं द्या..
आपल्या लाडक्या बहिणींवर काठी उगारणाऱ्या पोलिसांवर कारवाई करणार?
याठिकाणी जर महिलांना बोलावलं होतं तर तिथे महिला पोलीस कर्मचारी सुरक्षेसाठी का नव्हत्या?
लक्षात ठेवा, लाडकी बहीण आता तुम्हाला माफ करणार नाही. आपलं लाडक्या बहिणीचं सोंग, आता महिलांनाही कळालं आहे, त्यासुद्धा योग्य वेळी तुम्हाला तुमची योग्य ती जागा दाखवतील.
