नवी दिल्ली (इंडिया दर्पण वृत्तसेवा) – मध्य प्रदेशातील कुनो नॅशनल पार्क (KNP) मध्ये नामिबिया आणि दक्षिण आफ्रिकेतून आणलेल्या चित्ता आणि बछड्यांच्या मृत्यूच्या पार्श्वभूमीवर केंद्र सरकारने एक समिती स्थापन केली आहे. ही ११ सदस्यीय समिती आता या चित्ता पुनर्वसन प्रकल्पाच्या प्रगतीचा आढावा आणि देखरेख करणार आहे.
मध्य प्रदेशातील कुनो नॅशनल पार्कमध्ये तीन बछड्यांच्या मृत्यूनंतर ग्लोबल टायगर फोरमचे सरचिटणीस राजेश गोपाल यांच्या अध्यक्षतेखाली समिती स्थापन करण्याचा निर्णय घेण्यात आला. उल्लेखनीय म्हणजे, पंतप्रधान नरेंद्र मोदी यांनी एका महत्त्वाकांक्षी चित्ता पुनर्वसन प्रकल्पाचा एक भाग म्हणून गेल्या वर्षी १७ सप्टेंबर रोजी त्यांच्या ७२ व्या वाढदिवशी नामिबिया ते कुनो येथे आठ चित्त्यांना सोडले होते. तसेच १८ फेब्रुवारी रोजी दक्षिण आफ्रिकेतून आणलेल्या १२ चित्त्यांना कुनो येथे सोडण्यात आले.
तीन प्रौढ चित्ता आणि ज्वाला (सिया) या नामिबियन मादी चित्त्याच्या चारपैकी तीन बछड्यांचा कुनोमध्ये सुमारे दोन महिन्यांत मृत्यू झाला आहे, ज्यामुळे अनेक तज्ञांनी अधिवास आणि वन्यजीव व्यवस्थापनावर प्रश्नचिन्ह निर्माण केले आहेत. राष्ट्रीय व्याघ्र संवर्धन प्राधिकरण (NTCA) ने जारी केलेल्या निवेदनात म्हटले आहे की, समिती पर्यावरण पर्यटनासाठी चित्ता अधिवास उघडण्याबाबत सूचना करेल आणि या संदर्भात नियम तयार करेल. माहितीनुसार, ही समिती दोन वर्षांसाठी प्रभावी राहणार असून दर महिन्याला किमान एक बैठक घेणार आहे. कम्युनिटी इंटरफेस आणि प्रकल्प उपक्रमांमध्ये सहभागासाठीही समिती सुचवेल.
२९ मे रोजी बैठक
चित्त्यांच्या मृत्यूसंदर्भात केंद्रीय पर्यावरण मंत्री भूपेंद्र यादव २९ मे रोजी मुख्यमंत्री शिवराज सिंह चौहान यांच्यासोबत बैठक घेणार आहेत. या दरम्यान व्यवस्था, गरजा आणि उणिवा यांचा आढावा घेतला जाईल. कुनो नॅशनल पार्क (KNP) मध्ये जन्मलेल्या चौथ्या चित्ताच्या पिल्लाची प्रकृती स्थिर आहे. वन अधिकाऱ्याने ही माहिती दिली. चौथ्या चित्त्याची प्रकृती स्थिर असल्याची माहिती केएनपीचे संचालक उत्तम शर्मा यांनी दिली.
