एकनाथराव खडसे यांची ईडीची चौकशी पूर्ण : ९ तासानंतर कार्यालयातून पडले बाहेर

मुंबई – माजी मंत्री एकनाथराव खडसे ९ तासाच्या चौकशीनंतर  ईडी कार्यालयातून रात्री ८.१५ वाजता बाहेर पडले. बाहेर पडल्यानंतर माध्यमांशी संवाद न साधता ते घरी निघून गेले. त्यांच्या वकीलांनी मात्र या चौकशीबाबत माध्यमांशी संवाद साधला. यावेळी ते म्हणाले की, सर्व प्रकारचे सहकार्य केले, जी कागदपत्रे हवी होती ती सर्व दिली. अजून जी कागदपत्र हवी ती १० दिवसाच्या आत देण्यास सांगितले आहे. ती दिली जाणार आहे. गरज पडेल तेव्हा खडसे चौकशीसाठी येतील असेही त्यांनी सांगितले. जे व्यवहार झाले त्याबाबत ईडीने विचारणा केली. एमआयडीसीच्या भूखंडाचे डिटेलही खडसे यांनी दिल्याचे ते म्हणाले.

आज सकाळी खडसे सकाळी ११ वाजता चौकशीसाठी ईडी कार्यालयात पोहचले. त्यानंतर त्यांची ९ तास चौकशी करण्यात आली. या चौकशी अगोदर  प्रकृती खालावल्यामुळे त्यांची पत्रकार परिषद रद्द केली होती. पण, ईडी कार्यालयात जातांना त्यांनी पत्रकारांशी संवाद साधला होता. यावेळी त्यांनी ही चौकशी राजकीय हेतूने प्रेरीत आहे, पाच वेळा चौकशी झाल्यानंतर पुन्हा चौकशी होत आहे. गेल्या आठ दहा दिवसात व्हॅाटअॅपवर जळगावमध्ये एक मेसेज फिरतो आहे. त्यात कुछ तो होनेवाला आहे याचा अर्थ कार्यकर्त्यांना हे अगोदरच माहित आहे. मी ईडीला नेहमीच सहकार्य केले, आज जे प्रश्न विचारणार आहे त्याला उत्तर देणार आहे. ज्या भूखंडाबाबत चौकशी सुरु आहे. तो मुळातच वादग्रस्त असल्याचेही ते म्हणाले.

असा होता घटनाक्रम
माजी मंत्री तथा राष्ट्रवादी कॉंग्रेसचे ज्येष्ठ नेते एकनाथराव खडसे यांचे जावई गिरीश चौधरी यांना काल सकाळी सक्तवसुली संचलनालय अर्थात ईडीने अटक केली आहे. त्यानंतर दुपारी खडसे यांना ईडीने चौकशीला हजर राहण्यासाठी नोटीस बजावली होती. खडसे यांना आज सकाळी अकरा वाजता ईडीच्या मुंबई येथील कार्यालयात चौकशीसाठी हजर राहण्याचे कळविण्यात आले होते. खडसे ईडीच्या कार्यालयात जाण्याआधी राष्ट्रवादी कॉंग्रेसच्या प्रदेश कार्यालयात पत्रकार परिषद घेणार असल्याचे जाहीर करण्यात आले होते. यानंतर मात्र, आज सकाळी  राष्ट्रवादीने खडसे यांची प्रकृती बिघडल्यामुळे आजची पत्रकार परिषद रद्द करण्यात येत असल्याची माहिती ट्विटरच्या माध्यमातून दिली होती. पत्रकार परिषद रद्द झाल्यामुळे खडसे ईडीच्या कार्यालयात जाणार नाहीत, अशी माहिती समोर येत होती. परंतू खडसे सकाळी ११ वाजता ईडीच्या कार्यालयात दाखल झाले. त्यानंतर ते सव्वाआठच्या सुमारात बाहेर पडले.

–