नाशिक (इंडिया दर्पण वृत्तसेवा)– इगतपुरी तालुक्यातील जिंदाल पॉली फिल्म्स लिमिटेड या कंपनीच्या अडचणी वाढल्या आहेत. कंपनीला लागलेली आग धुमसत असतानाच आणखी दोन मोठ्या घडामोडी घडल्या आहेत. कंपनीचे शेअर्स ८ टक्क्यांपर्यंत घसरले असून राष्ट्रीय कंपनी कायदा न्यायाधिकरण (एनसीएलटी) कडे कंपनीच्या विरोधात तक्रार दाखल झाली आहे.
जिंदाल पॉली फिल्म्स लिमिटेडचा मुंबई-आग्रा हायवेलगत घोटी जवळ कारखाना आहे. कंपनीच्या प्लांटमध्ये अचानक आग लागली. अनेक तास शर्थीचे प्रयत्न केल्यानंतरही आग आटोक्यात येत नसल्याने भीतीचे वातावरण तयार झाले. हे सारे घडत असतानाच मुंबई शेअर बाजारातही त्याचे पडसाद पहायला मिळाले. जिंदालचे शेअर्स ८ टक्क्यांपर्यंत घसरले. २,८४८.०९ कोटी रुपयांच्या बाजार भांडवलासह जिंदाल पॉली फिल्म्स लिमिटेडचे शेअर्स प्रति शेअर ६५०.४५ रुपयांवर व्यवहार करत होते. जे मागील बंद किंमती ६९५.८५ रुपयांच्या तुलनेत सुमारे ६.५२ टक्क्यांनी कमी होते. आगीमुळे कंपनीची उत्पादन प्रक्रिया ठप्प झाली आहे. आगीचे कारण अद्याप स्पष्ट झालेले नाही. या आगीत कंपनीचे कोट्यवधीचे नुकसान झाले आहे.
कंपनीची आर्थिक कामगिरीकडे पाहता, आर्थिक वर्ष २०२४ मध्ये कंपनीच्या महसूलात ३९ टक्क्यांनी वाढ झाली आहे. यंदाच्या तिमाहीत कंपनीची उलाढाल ९८३.७६ कोटी रुपयांवरुन १,३७१.२० कोटी रुपयांवर पोहोचला.
निधीच्या उधळपट्टीचा आरोप
जिंदाल पॉली फिल्म्सच्या भागधारकांनी एनसीएलटीकडे धाव घेतली आहे. भागधारकांनी कंपनी विरोधात क्लास अॅक्शन खटला ९ एप्रिल रोजी दाखल केला आहे. प्रवर्तकांनी निधीची उधळपट्टी केल्याचा आरोप याद्वारे करण्यात आला आहे. एनसीएलटीकडे दाखल केलेल्या तक्रारीनुसार, कथित गैरवर्तनामुळे कंपनीला सुमारे दोन हजार कोटी रुपयांचे मोठे आर्थिक नुकसान झाले आहे. जिंदाल पॉली फिल्म्सने आर्थिक वर्ष २०१३ ते आर्थिक वर्ष २०१७ दरम्यान जिंदाल इंडिया पॉवरटेक लिमिटेड आणि जिंदाल इंडिया थर्मल पॉवर लिमिटेड या दोन संबंधित कंपन्यांमध्ये ऑप्शनली कन्व्हर्टेबल प्रेफरन्स शेअर्स (ओसीपीएस) आणि रिडीमेबल प्रेफरन्स शेअर्स (आरपीएस) सारख्या आर्थिक साधनांचा वापर करून ७०० कोटी रुपयांची गुंतवणूक केली आहे.
