इंडिया दर्पण ऑनलाईन डेस्क – भारतीय भारोत्तोलक लालरिनुंगा जेरेमीने बर्मिंगहॅम येथे आज राष्ट्रकुल क्रीडा स्पर्धेत सुवर्णपदक जिंकले. विशेष म्हणजे, जेरेमी हा दुखापतग्रस्त असतानाही त्याने आज तिसऱ्या दिवशी पुरुषांच्या 67 किलो गटात विक्रमी वजन उचलून सुवर्णपदक जिंकले. स्नॅचमध्ये, जेरेमीने 140 किलो वजन उचलून नवीन राष्ट्रकुल खेळांचा विक्रम प्रस्थापित केला, तर क्लीन अँड जर्कमध्ये त्याने 160 किलो वजन उचलले आणि एकूण 300 किलो वजन उचलून त्याच्या गटात नवीन राष्ट्रकुल खेळांचा विक्रम प्रस्थापित केला. वेटलिफ्टिंगमधील भारताचे हे दुसरे सुवर्ण आणि एकूण पाचवे पदक आहे. लालरिनुंगा जेरेमीपूर्वी, संकेत सरगर (रौप्य), गुरुराज पुजारी (कांस्य), मीराबाई चानू (सुवर्ण) आणि बिंदयाराणी देवी (रौप्य) यांनी भारतासाठी पदके जिंकली होती.
जेरेमीबद्दल सांगायचे तर, स्नॅचमध्ये त्याने पहिल्या प्रयत्नात 136 किलो वजन उचलले, तर दुसऱ्या प्रयत्नात त्याने 140 किलो वजन उचलले आणि राष्ट्रकुल क्रीडा स्पर्धेत 67 किलो गटात नवा विक्रम प्रस्थापित केला. तिसऱ्या प्रयत्नात त्याने 143 किलो वजन उचलण्याचा प्रयत्न केला पण तो अयशस्वी ठरला. स्नॅचमध्ये तो दुसऱ्या क्रमांकाच्या नायजेरियनपेक्षा 10 किलोने पुढे होता.
https://twitter.com/narendramodi/status/1553692906841677824?s=20&t=Z96bUjO78gDZnP47hElxQg
क्लीन अँड जर्कमध्ये जेरेमीने पहिल्याच प्रयत्नात १५४ किलो वजन उचलले आणि यादरम्यान तो जखमीही झाला. पहिल्याच प्रयत्नात त्याने राष्ट्रकुल स्पर्धेत एकूण 294 किलो वजन उचलून नवा विक्रम प्रस्थापित केला. दुसऱ्या प्रयत्नात या भारतीय वेट लिफ्टरने दुखापतग्रस्त असतानाही 160 किलो वजन उचलून सर्वांना चकित केले. दुसऱ्या प्रयत्नानंतर जेरेमी गुडघे टेकला होता, पण वजन उचलल्याचा आनंद त्याच्या चेहऱ्यावर स्पष्ट दिसत होता. दुसऱ्या प्रयत्नानंतर त्याचे एकूण वजन 300 किलो झाले. दुखापत असूनही जेरेमीने जोखीम पत्करून तिसऱ्या प्रयत्नात 165 किलो वजन उचलण्याचा प्रयत्न केला, मात्र त्यात तो अपयशी ठरला. यापूर्वी त्याच्या पायाला दुखापत झाली होती, मात्र तिसऱ्या प्रयत्नानंतर त्याच्या डाव्या हातालाही मार लागला होता.
Jeremy Lalrinnunga Win Gold Medal In Commonwealth Games 2022
