नवी दिल्ली (इंडिया दर्पण वृत्तसेवा) – वाढत्या उष्णतेसह महागाईच्या आगीत होरपळणाऱ्या देशातील एलपीजी गॅस सिलिंडर ग्राहकांना पुन्हा एकदा झटका बसला आहे. घरगुती गॅस सिलिंडरसह व्यावसायिक सिलिंडरच्या किमती १९ मे रोजी वाढल्या आहेत. या महिन्यात दुसऱ्यांदा घरगुती सिलिंडरच्या किमती वाढल्या आहेत. ७ मे रोजी सिलिंडर ५० रुपयांनी महागले होते. आज पुन्हा एकदा किमती वाढल्याने महागाईच्या आगीत तेल ओतले गेले आहे.
पेट्रोल-डिझेलसह खाद्यपदार्थाच्या किमती महाग झाल्यामुळे जनता त्रस्त झाली आहे. त्यात आता पुन्हा एकदा सिलिंडर महागल्यामुळे सामान्य माणसांनी जगावे कसे हा प्रश्न उपस्थित होत आहे. गेल्या ७ मे रोजी घरगुती एलपीजी सिलिंडर ५० रुपयांनी महाग झाले होते. त्यामुळे देशातील बहुतांश भागात एका गॅस सिलिंडरची किंमत १००० रुपयांच्यावर पोहोचली. परंतु दिल्लीत किंमत कमी होती.
आज घरगुती सिलिंडरची किंमत ३ रुपये ५० पैशांनी वाढल्यामुळे हे अंतरही मिटले आहे. आता संपूर्ण देशात एका घरगुती सिलिंडरची किंमत १००० रुपयांवर पोहोचली आहे. गेल्या वर्षभरात दिल्लीतील घरगुती सिलिंडर ८०९ रुपयांवरून १००३ रुपयांवर पोहोचले आहे. दिल्ली आणि मुंबईमध्ये १४.२ किलो वजनाचे घरगुती सिलिंडर १००३ रुपये, कोलकाता येथे १०२९ रुपये, चेन्नईमध्ये १०१८.५ रुपयांना मिळणार आहे.
सात मे रोजी एलपीजीच्या दरात बदल झाल्यामुळे घरगुती सिलिंडर ५० रुपयांनी महाग झाले होते. तर १९ किलो वजनाचे व्यावसायिक गॅस सिलिंडर १० रुपयांनी स्वस्त झाले होते. आता व्यावसायिक सिलिंडरच्या किमतीही वाढल्या असून, एक सिलिंडर ८ रुपयांनी महागले आहे. आता दिल्लीमध्ये १९ किलो वजनाचे सिलिंडर २३५४ रुपये, कोलकातामध्ये २४५४ रुपये, मुंबईमध्ये २३०६ रुपये आणि चेन्नईमध्ये २५०७ रुपयांत मिळणार आहे.
एक मे रोजी व्यावसायिक गॅस सिलिंडरची किंमत १०० रुपयांनी वाढली होती. मार्चमध्ये १९ किलो वजनाच्या व्यावसायिक गॅस सिलिंडरची किंमत २०१२ रुपये होती.१ एप्रिल रोजी ते वाढून २२५३ रुपये आणि १ मे रोजी २३५५ रुपयांवर पोहोचले होते. गेल्या वर्षभरात व्यावसायिक सिलिंडरच्या किमतीत ७५० रुपयांची वाढ झाली आहे.
