मुंबई (इंडिया दर्पण वृत्तसेवा)– कल्याणच्या बी. के. बिर्ला महाविद्यालयाच्या 6 महाराष्ट्र बटालियन एनसीसीची कॅडेट ऋषिका रमेश कदम हिने इंडो-नेपाळ युवा क्रीडा स्पर्धा 2025 मध्ये सुवर्णपदक जिंकल्याबद्दल महाराष्ट्र संचालनालयाचे अतिरिक्त महासंचालक मेजर जनरल योगेंद्र सिंग, व्हीएसएम यांच्या हस्ते तिचा सत्कार करण्यात आला. ही स्पर्धा नेपाळच्या काठमांडू येथे 28 मे ते 01 जून 2025 दरम्यान घेण्यात आली. एनसीसी महाराष्ट्र संचालनालयाच्या मुख्यालयात झालेल्या या सत्कार कार्यक्रमाला कॅडेट ऋषिकाचे पालक, अधिकारी आणि संचालनालयाच्या कर्मचार्‍यांची उपस्थिती होती.
16-20 वयोगटातील स्पर्धेत सहभाग घेत कॅडेट ऋषिका रमेश कदम हिने विविध योगासनांचे सादरीकरण करताना अपवादात्मक कौशल्य आणि शिस्त दाखवली. या स्पर्धेत भारत, बांगलादेश, भूतान, म्यानमार, नेपाळ, श्रीलंका, व्हिएतनाम, थायलंड आणि इंडोनेशिया या नऊ देशांतील 40 हून अधिक स्पर्धकांनी उत्साहाने भाग घेतला.
