इंडिया दर्पण ऑनलाईन डेस्क
कल्याणः गुन्ह्यांचा तपास करण्यासाठी आणि आरोपींना अटक करण्यासाठी पोलिसांना काय काय करावे लागते, हे त्यांनाच माहीत. कधी कधी वेषांतर करून ते आरोपीच्या मुसक्या आवळतात. डोंबिवलीतील मानपाडा पोलिसांनी एका सराईत गुन्हेगाराला पकडण्यासाठी वीटभट्टी कामगारांचा पेहराव केला आणि तब्बल पाच दिवसानंतर सापळा रचून आरोपीला ताब्यात घेतले. राजेश अरविंद राजभर असे या सराईत गुन्हेगाराचे नाव आहे
या आरोपीस आझमगड, उत्तरप्रदेश येथून एकूण २१ लाख २६ हजार ६०० रुपये किंमतीचे ३४३.५ ग्रॅम वजनाचे सोन्याचे दागिने अशा मुददेमालही हस्तगत केला. डोंबिवली पूर्व परिसरातील ओमकार भाटकर हे रक्षाबंधनासाठी गावी गेले होते. ही संधी साधून एका चोरच्याने घरातील सोन्या, चांदीचे दागिने चोरले. याप्रकरणी मानपाडा पोलिस ठाण्यात तक्रार दाखल करण्यात आली होती. पोलिस उपायुक्त सचिन गुंजाळ याच्या मार्गदर्शनाखाली मानपाडा पोलिस ठाण्याचे वरिष्ठ पोलीस निरीक्षक अशोक हुणमाणे यांच्या नेतृत्वाखाली पथके तपासासाठी रवाना करण्यात आली. संशयित आरोपी उत्तर प्रदेशातील आझमगडमध्ये असल्याची माहिती पोलिसांना मिळाली.
पोलिसांनी थेट आजमगड गाठले. वीटभट्टी कामागरांचा पेहराव करून त्या परिसरातील वीटभट्टीवर सुमारे पाच दिवस काम करून आरोपीवर पाळत ठेवली. पाचव्या दिवशी सापळा रचत कामगारांच्या वेषातील पोलिसांनी राजेश अरविंद राजभर याला बेड्या ठोकल्या. राजेश हा एक सराईत चोरटा असून त्याने महात्मा फुले, पनवेल, अर्नाळा सागरी, अंबरनाथ, कोळसेवाडी, बदलापूर, शिवाजीनगर, डोंबिवली, डायघर परिसरात २२ पेक्षा अधिक ठिकाणी घरफोडी केल्या.
