नाशिक (इंडिया दर्पण वृत्तसेवा)– सिडकोतील उत्तमनगर भागात झालेल्या घरफोडीत चोरट्यांनी सुमारे साडे ४५ हजाराच्या ऐवजावर डल्ला मारला. त्यात १५ हजाराच्या रोकडसह सोन्याचांदीच्या दागिण्यांचा समावेश आहे. याबाबत अंबड पोलीस ठाण्यात घरफोडीचा गुन्हा दाखल करण्यात आला आहे.
योगेश रमेश सुर्वे (रा.सर्वेश्वर चौक,उत्तमनगर ) यांनी याबाबत फिर्याद दिली आहे. सुर्वे कुटूंबिय दि.२३ ते २६ जुलै दरम्यान बाहेरगावी गेले असता ही घटना घडली. अज्ञात चोरट्यांनी बंद घराचा कडीकोयंडा तोडून कपाटात ठेवलेली रोकड व सोन्याचांदीचे दागिणे असा सुमारे ४५ हजार ५०० रूपये किमतीचा ऐवज चोरून नेला. अधिक तपास हवालदार बनतोडे करीत आहेत.
चोरट्यांनी मशनरी चोरून नेली
नाशिक (इंडिया दर्पण वृत्तसेवा)- फॅब्रीकेशन कारखान्याचा पत्रा उचकटून चोरट्यांनी मशनरी चोरून नेली. ही घटना औद्योगीक वसाहतीतील तलाठी कार्यालय भागात घडली. याप्रकरणी अंबड पोलीस ठाण्यात गुन्हा दाखल करण्यात आला आहे.
राघवेंद्र कुमार सिंग (रा.माऊली चौक,दत्तनगर) यांनी फिर्याद दिली आहे. सिंग यांचा अंबड औद्योगीक वसाहतीतील तलाठी कार्यालय परिसरात शक्तीमान मशनरी अ‍ॅण्ड फेब्रीकेशन नावाचा कारखाना आहे. गेल्या शनिवारी (दि.१३) रात्री अज्ञात चोरट्यांनी बंद शॉपच्या दरवाजाचा पत्रा उचकटून कारखान्यातील दोन ग्रॅण्डर मशिन व गॅस कटर मशिन सिलेंडरसह चोरून नेले. अधिक तपास पोलीस नाईक टिळेकर करीत आहेत.
तलवार बाळगणा-यास पोलीसांनी बेड्या ठोकल्या
नाशिक (इंडिया दर्पण वृत्तसेवा)- नांदूर जत्रा हॉटेल लिंकरोड भागात तलवार बाळगणा-यास पोलीसांनी बेड्या ठोकल्या. संशयिताच्या ताब्यातून धारदार लोखंडी तलवार हस्तगत करण्यात आली असून याप्रकरणी आडगाव पोलीस ठाण्यात गुन्हा दाखल करण्यात आला आहे.
कृष्णा विष्णू काळे (२१ रा.महादेव मंदिराजवळ,शिवमुद्रा चौक इच्छामणीनगर ) असे गुन्हा दाखल करण्यात आलेल्या संशयित तलवारधारीचे नाव आहे. नांदूर जत्रा लिंकरोडवरील गणेश मार्केट भागात असलेल्या एकाकडे तलवार असल्याची माहिती पोलीसांना मिळाली होती. त्यानुसार शुक्रवारी (दि.२६) आडगाव पोलीसांनी धाव घेत सेल्फी पॉईंट भागात संशयिताच्या मुसक्या आवळल्या. त्याच्या अंगझडतीत मिळालेली तलवार जप्त करण्यात आली असून याबाबत अंमलदार दिनेश गुंबाडे यांनी दिलेल्या फिर्यादीवरून गुन्हा दाखल करण्यात आला आहे. अधिक तपास हवालदार कहांडळ करीत आहेत.
