इंडिया दर्पण ऑनलाईन डेस्क
मुंबईः केंद्रीय निवडणूक आयोगाने अगोदर निधी घेण्यास मान्यता दिल्यानंतर आता शरद पवार गटाला आणखी मोठा दिलासा दिला आहे. अपक्ष उमेदवारांच्या निवडणूक चिन्हांच्या यादीतील पिपाणी हे चिन्ह गोठवण्याचा निर्णय घेतल्याने लोकसभेत झालेले नुकसान आता विधानसभा निवडणूकीत होणार नाही. सारखे चिन्ह असल्यामुळे अगोदरच शरद पवार गटाने तक्रार केली होती. पण, त्यावेळेस दखल घेतली नाही. आता त्याची दखल घेण्यात आली.
तुतारी आणि पिपाणी या चिन्हातील साधर्म्यामुळे मतदारांचा होणारा गोंधळ पवार यांनी निवडणूक आयोगाच्या निदर्शनास आणून दिला होता. त्यानंतर पिपाणी चिन्ह गोठवण्यासाठी निवडणूक आयोगाकडे मागणी केली होती. त्यातून हा दिलासा मिळाला आहे.
दिंडोरी लोकसभा निवडणुकीत अपक्ष उमेदवार बाबू भगरे यांना पिपाणी चिन्ह देण्यात आले होते. त्यांना पिपाणी चिन्ह असलेल्या राज्यातील अपक्ष उमेदवारांत सर्वाधिक तब्बल १ लाख ३ हजार ६३२ मते मिळाली होती. राष्ट्रवादी काँग्रेस शरदचंद्र पवार गटाने पिपाणी चिन्हामुळे आम्हाला निवडणुकीमध्ये फटका बसल्याची भावना व्यक्त करत हे चिन्ह रद्द करण्याची मागणी निवडणूक आयोगाकडे केली होती. त्यांच्या मागणीनुसार निवडणूक आयोगाने पिपाणी चिन्ह गोठवण्याचा निर्णय घेतला.
सातारा लोकसभा मतदारसंघात ३७ हजार मते अपक्ष उमेदवाराच्या ‘पिपाणी’ला पडली. शरद पवार गटाने लढवलेल्या दहा लोकसभा मतदारसंघात पिपाणी चिन्ह असलेल्या उमेदवारांना तब्बल चार लाखांपेक्षा जास्त मते मिळवली. त्यामुळे विधानसभेला तुतारीसमोर पिपाणीचा धोका वाटल्याने शरद पवार गट निवडणूक आयोगाकडे गेला होता. बीडमध्ये पिपाणी चिन्ह असलेल्या अशोक थोरात या उमेदवाराला ५४ हजार ८५० मते, बारामती मतदारसंघात सोयलशाह शेख या उमेदवाराला १४ हजार ९१७ मते, तर नगरमध्ये पिपाणी चिन्ह असलेल्या उमेदवाराला ४२ हजार मते मिळाली होती.
