नाशिक (इंडिया दर्पण वृत्तसेवा)– तालुक्यातील शिंदे येथे अंगणात सायकल खेळणा-या अकरा वर्षीय बालिकेस घरात बोलावून घेत लैंगिक चाळे करणा-या ३५ वर्षीय संशयितास पोलीसांनी गजाआड केले आहे. बालिकेने घरी जावून आपबिती कथन केल्याने हा प्रकार पोलीसात पोहचला असून याप्रकरणी नाशिकरोड पोलीस ठाण्यात विनयभंगासह बाल लैंगिक अपराधापासून संरक्षण कायद्यान्वये गुन्हा दाखल करण्यात आला आहे.
पोलीसांनी दिलेल्या माहितीनुसार अझहर उर्फ साहिल खान (रा.इंदिरानगर,नायगावरोड) असे अटक करण्यात आलेल्या संशयिताचे नाव आहे. पीडितेच्या आईने याबाबत फिर्याद दिली आहे. अकरा वर्षीय पीडिता बुधवारी (दि.१७) सकाळच्या सुमारास आपल्या घर परिसरात सायकल खेळत असतांना ही घटना घडली. संशयिताच्या अंगणातून ती सायकल चालवित असतांना तिला अझरहरने आवाज देवून घरात बोलावून घेतले.
घरात कुणी नसल्याची संधी साधत संशयिताने मुलीचा विनयभंग केला. संशयिताच्या घरासमोर बराच वेळापासून सायकल लावलेली आढळून आल्याने मुलीस तिच्या आईने आवाज देवून बोलावून घेतल्याने हा प्रकार समोर आला. घरी येवून मुलीने आपबिती कथन केल्याने हा प्रकार पोलीसात पोहचला असून अधिक तपास सहाय्यक निरीक्षक कोरडे करीत आहेत.
