जालना (इंडिया दर्पण वृत्तसेवा) – समृद्धी महामार्गावर जालन्यातील कडवंची गावाजवळ दोन गाड्यांचा भीषण अपघात होऊन त्यात सात जण ठार झाले, तर तिघे गंभीर जखमी झाले आहेत. जखमींना जिल्हा सामान्य रुग्णालयात उपचारासाठी दाखल करण्यात आलं आहे.
नागपूरहून मुंबईकडे जाणाऱ्या कारला चुकीच्या दिशेने येणाऱ्या कारची धडक बसल्यामुळे हा अपघात झाला. या अपघातामध्ये सहा जण जागीच ठार झाले, तर एकाचा उपचारा दरम्यान मृत्यू झाला. रात्री अकराच्या सुमारास नागपूरवरून मुंबईकडे जाणारी आर्टिका आणि चुकीच्या दिशेने येणाऱ्या स्विफ्ट डिझायरची समोरासमोर धडक झाली. अपघाताची माहिती कळताच पोलिसांनी घटनास्थळी धाव घेत जखमींना उपचारासाठी जिल्हा सामान्य रुग्णालयामध्ये दाखल केले. एकाची प्रकृती गंभीर असल्याने त्याला उपचारासाठी छत्रपती संभाजीनगरला पाठवण्यात आले आहे.
रस्त्याच्या कडेला पडलेल्या आर्टिका गाडी क्रेनच्या सहाय्याने वर काढण्यात आली. हा अपघात एवढा भीषण होता, की आर्टिका महामार्गाचे बॅरिकेट्स तोडून रस्त्याच्या खाली कोसळली. या अपघातात दोन्ही गाड्यांचा पुरता चक्काचूर झाला.
