इंडिया दर्पण ऑनलाईन डेस्क
सिन्नर येथील भाजपचे प्रभारी जयंत आव्हाड यांनी तरुणीस अश्लील व अर्वाच्य भाषेत शिवीगाळ केल्याचा एक व्हिडिओ शिवसेना ठाकरे गटाच्या नेत्या सुषमा अंधारे यांनी सोशल मीडियावर पोस्ट केला आहे. या व्हिडिओनंतर राजकीय वर्तूळात मोठी चर्चा सुरु झाली आहे.
या व्हिडिओ पोस्ट करतांना अंधारे यांनी म्हटले आहे की, संस्कार बघा भाजपाचे.. कष्टकरी मायमाऊली कार्यालयात झाडलोट, फरशी कामाचा दीड महिन्याचा पगार मागण्यासाठी गेली असता सिन्नरचा भाजप प्रभारी जयंत आव्हाडने त्या तरुणीस अश्लील व अर्वाच्य भाषेत शिवीगाळ केली..
या महिलेची ३५४ नुसार विनयभंगाची तक्रारही पोलीस स्टेशनने घेतलेली नाही.
आव्हाड यांची पोलिस स्थानकात ही तक्रार
दरम्यान ही पोस्ट व्हायरल झाल्यानंतर जयंत आव्हाड यांनी सिन्नर पोलिस ठाण्यात दिलेला अर्ज समोर आला असून त्यात म्हटले आहे, सिन्नर तालुका भारतीय जनता पार्टीचे कार्यालय गाळा नं १२/१३, सुर्योदय संकुल येथे आहे. सदर कार्यालयामध्ये दिक्षा महेश कुलकणी राहणार सिन्नर ही मुलगी नोकरी करत होती. एक महिन्यापुर्वी तीने कार्यालयाच्या केबीन मधून एक लाख रूपये चोरी केले. दुसऱ्याच दिवशी माझ्या लक्षात अल्यानंतर मी तिला विचारले असता तिने पैसे चोरी केल्याचे कवूल केले. मी व माझी आई कर्जबाजारी असून कर्जाची परतफेड करण्यासाठी पैसे चोरल्याचे तिने कबूल केले. चार दिवसात तुमचे पैसे आणून देते असे तिने कबुल केले. परंतू तिने अजून पैसे आणून दिले नाही. तिच्यावर फौजदारी गुन्हा दाखल करून माझे चोरी झालेले पैसे परत मिळवून द्यावे असे त्यांनी पोलिसांनी दिलेल्या अर्जात म्हटले आहे.
