नाशिक (इंडिया दर्पण वृत्तसेवा) – शहरात असून वेगवेगळया भागात पार्क केलेल्या दोन मोटारसायकली चोरट्यांनी चोरून नेल्या. याप्रकरणी पंचवटी व अंबड पोलिस ठाण्यात गुह्याची नोंद करण्यात आली आहे.
पहिली घटना सिडकोत घडली. जयेश आत्माराम कोठावदे (४१ रा.आयटीआय लिंकरोड साळुंके नगर) यांनी याप्रकरणी तक्रार दाखल केली आहे. कोठावदे हे मंगळवारी (दि.२४) त्रिमुर्ती लाईट हाऊस भागात गेले होते. परिसरात पार्क केलेली त्यांची एमएच १५ ईवाय ०३१२ दुचाकी चोरट्यांनी चोरून नेली. याप्रकरणी अंबड पोलिस ठाण्यात गुह्याची नोंद करण्यात आली असून अधिक तपास पोलिस नाईक संगम करीत आहेत.
सायकलचोर जेरबंद
दुसरी घटना गोदाकाठवर घडली. म्हसरूळ परिसरातील रत्नेश्वर सत्यनारायण ढगे (रा.शिवपार्क अपा.कलानगर) हे सोमवारी (दि.२३) सायंकाळच्या सुमारास गोदाघाटावर गेले होते. रामकुंड परिसरातील कपालेश्वर महादेव मंदिरासमोर त्यांनी आपली स्प्लेंडर एमएच १५ जेजी ६१०८ पार्क केली असता ती चोरट्यांनी चोरून नेली. याप्रकरणी पंचवटी पोलिस ठाण्यात गुह्याची नोंद करण्यात आली असून अधिक तपास पोलिस नाईक बाविस्कर करीत आहेत.
औद्योगीक वसाहतीमधील चोरी प्रकरणात एकास अटक
औद्योगीक वसाहतीतील एका इमारतीच्या पार्किंगमध्ये लावलेली सायकल चोरी केल्याप्रकरणी पोलिसांनी एकास अटक केली आहे. प्रतिक रविंद्र पाठक (२२ रा.निगळ संकुल संभाजीराजा चौक,संजीवनगर) असे संशयित भामट्याचे नाव आहे. दातीरनगर येथील देवेंद्र लालमन सिंह (रा.सुयोग रेसि.मारूती संकुल) यांनी याप्रकरणी तक्रार दाखल केली आहे. सिंह यांची सायकल गेल्या बुधवारी (दि.१८) दुपारच्या सुमारास सोसायटीच्या पार्किंगमध्ये लावलेली असतांना ती चोरट्यांनी चोरून नेली होती. याप्रकरणी अंबड पोलिस ठाण्यात गुन्हा दाखल करण्यात आला होता. पोलिसांनी संशयितास अटक केली असून अधिक तपास हवालदार चव्हाण करीत आहेत.
