नाशिक (इंडिया दर्पण वृत्तसेवा)- शहरात वेगवेगळया भागातून चारचाकी बोलेरोसह दुचाकी चोरट्यांनी चोरून नेली. याप्रकरणी भद्रकाली व पंचवटी पोलीस ठाण्यात गुन्हे दाखल करण्यात आले आहेत.
द्वारका परिसरातील टाकळीरोड भागात राहणारे विवेक देविकिनंदन शर्मा (रा.शितल सोसा.शंकरनगर) यांनी याबाबत फिर्याद दिली आहे. शर्मा यांची एमएच १५ सीएम ९२५५ बोलेरो चारचाकी गेल्या गुरूवारी (दि.१३) रात्री त्यांच्या सोसायटीच्या आवारात लावलेली असतांना ती चोरट्यांनी पळवून नेली. याबाबत भद्रकाली पोलीस ठाण्यात गुह्याची नोंद करण्यात आली असून अधिक तपास हवालदार सोनवणे करीत आहेत.
मोटारसायकल चोरीची घटना पंचवटी कारंजा भागात घडली. किरण अशोक मोरे (रा.प्रमोद महाजन गार्डन समोर,रासबिहारी रोड पंचवटी) यांनी याबाबत फिर्याद दिली आहे. मोरे शनिवारी (दि.२२) पंचवटी कारंजा भागात गेले होते. निमाणी नजीकच्या आयुश हॉस्पिटल भागात त्यांनी आपली दुचाकी एमएच १५ एफडी ६२३७ पार्क केली असता ती चोरट्यांनी चोरून नेली. याबाबत पंचवटी पोलीस ठाण्यात गुन्हा दाखल करण्यात आला असून अधिक तपास हवालदार चव्हाण करीत आहेत.
